(រាជធានីភ្នំពេញ)៖ បុរសម្នាក់ ត្រូវជនសង្ស័យ២នាក់ ធ្វើសកម្មភាពបាញ់ ចំនួន ៦គ្រាប់ តែត្រូវ ៣គ្រាប់ ១គ្រាប់ បញ្ឆិតក្បាល ១គ្រាប់ បញ្ឆិតកែងដៃឆ្វេង និងធ្លាយពោះ ១គ្រាប់ ទៅខ្នង រងរបួសធ្ងន់ ស្លាប់ពេលបញ្ជូនទៅកាន់មន្ទីរពេទ្យ។
ករណីនេះ បានកើតឡើងកាលពីវេលាម៉ោង០១ និង៥០នាទី យប់ ឈានចូលថ្ងៃទី ១១ មេសា ២០១៦ នៅក្នុងប្លុក ភូមិត្រពាំងឈូក សង្កាត់ទឹកថ្លា ខណ្ឌសែនសុខ។ ជនរងគ្រោះ មានឈ្មោះ ឆាយ ចិន្តា អាយុ ២៣ឆ្នាំ មុខរបរមិនពិតប្រាកដ ស្នាក់នៅ ផ្ទះលេខ ៤៩B ផ្លូវ១៣៩ សង្កាត់ផ្សារដេប៉ូ២ ខណ្ឌទួលគោក។
តាមប្រភពព័ត៌មាន ពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញជនរងគ្រោះ ដើរក្នុងប្លុកត្រពាំងឈូក ខណ: ពេលកំពុងធ្វើដំណើរ ក៏មានជនសង្ស័យមានគ្នា ២នាក់ ជិះម៉ូតូ ១គ្រឿង ម៉ាក យ៉ាម៉ាហាហ្វីណូ ពណ៌សលាយផ្កាឈូក មកដល់ចំណុចកើតហេតុ ក៏បានដកកាំភ្លើង បាញ់ទៅលើជនរងគ្រោះ ចំនួន ៦គ្រាប់ តែត្រូវចំនួន ៣គ្រាប់ ១គ្រាប់ ធ្លាយពោះទៅក្រោយខ្នង និង ២គ្រាប់ទៀត បញ្ឆិតក្បាល និងកែងដៃ។
សូមបញ្ជាក់ថា ករណីជនមិនស្គាល់មុខ បាញ់ប្រហារបុរសម្នាក់ នៅក្នុងប្លុកត្រពាំងឈូក កាលពីពេលយប់ ម៉ោង២ រំលងអាធ្រាត្រ ជនរងគ្រោះ បានស្លាប់បាត់បង់ជីវិត នៅម៉ោង០៤ និង៣០នាទី ទៀបភ្លឺ ឈានចូលព្រឹក ថ្ងៃទី១១ មេសា ២០១៦ នេះ៕
មតិយោបល់