បាត់ដំបងៈ ករណីគ្រោះចរាចរណ៍ដ៏រន្ធត់មួយបានកើតឡើង រវាងម៉ូតូឌ្រីម បើកបរលឿនក្នុងស្ថានភាពស្រវឹង ជ្រុលចង្កូតទៅបុកម៉ូតូវ៉េវ ក្នុងដំណើរបញ្ច្រាសទិសគ្នា បណ្តាលឲ្យម្ចាស់ម៉ូតូឌ្រីមស្លាប់ ចំណែកឯភាគីខាងម៉ូតូវ៉េវរបួសធ្ងន់២នាក់ ត្រូវបញ្ជូនទៅសង្គ្រោះនៅមន្ទីរពេទ្យបង្អែកស្រុកសំពៅលូន។
ហេតុការណ៍នេះបានកើតឡើង កាលពីវេលាម៉ោង៥និង២០នាទីល្ងាច ថ្ងៃទី៣១ ខែមករា ឆ្នាំ២០១៨ ស្ថិតនៅចំណុចកែងភ្នំប្រាំពីរ ភូមិភ្នំប្រាំពីរ ឃុំបួរ ស្រុកភ្នំព្រឹក ខេត្តបាត់ដំបង។
ម្ចាស់ម៉ូតូឌ្រីមឈ្មោះ សម្បតិ្ត បូ ភេទប្រុស អាយុ២៥ឆ្នាំ(ស្លាប់) រស់នៅភូមិឃុំកើតហេតុ ជិះម៉ូតូហុងដាសេ១២៥ ពណ៌ខ្មៅ ស៊េរីឆ្នាំ ២០១៤ ពាក់ស្លាកលេខ បាត់ដំបង 1N-9295។ ចំណែកម្ចាស់ម៉ូតូវ៉េវឈ្មោះ ឡុង នុត ភេទប្រុស អាយុ២២ឆ្នាំ រស់នៅភូមិបួរ ឃុំបួរ ស្រុកភ្នំព្រឹក បើកម៉ូតូហុងដាវ៉េវពណ៌ខ្មៅ គ្មានស្លាកលេខ រងរបួសធ្ងន់បាក់ដៃឆ្វេង និង បាក់ភ្លៅខាងស្ដាំ និងអ្នករួមដំណើរជាមួយ ឈ្មោះ សឿត កក្កដា ភេទប្រុស អាយុ២១ឆ្នាំ រស់នៅភូមិឃុំជាមួយគ្នា រងរបួសធ្ងន់ បាក់កំភួនជើងខាងស្ដាំ។
ក្រោយកើតហេតុ សមត្ថកិច្ច បាននាំយកវត្ថុតាងមករក្សាទុក នៅប៉ុស្តិ៍នគរបាលរដ្ឋបាលឃុំបួរ។ ចំណែកសពប្រគល់ជួនក្រុមគ្រួសារ យកទៅធ្វើបុណ្យតាមប្រពៃណី៕
មតិយោបល់