ភ្នំពេញៈ សាកសពស្រ្តីម្នាក់ ត្រូវបានប្រជាពលរដ្ឋប្រទះឃើញកាលពីព្រលប់ថ្ងៃទី១៤ ខែមិថុនា ឆ្នាំ២០១៦ នៅត្រង់ចំណុចម្តុំរង្វល់មូលទី១ ជិតស្ពាន លី យ៉ុងផាត់ ប្រហែល១៥ម៉ែត្រ ស្ថិតនៅក្នុងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ។

សមត្ថកិច្ចបានប្រាប់ឲ្យដឹងថា នៅវេលាម៉ោង ៧និង១០នាទីយប់ ថ្ងៃទី១៤ ខែមិថុនា ឆ្នាំ២០១៦ កម្លាំងសមត្ថកិច្ចយើងបានទទួលដំណឹងពីប្រជាពលរដ្ឋមកថា បានប្រទះឃើញសាកសពស្ត្រីម្នាក់ដេកស្លាប់នៅក្នុងដីឡូត៍ឧកញ៉ា លី យ៉ុងផាត់។ ក្រោយពីបានទទួលដំណឹងនេះហើយ កម្លាំងសមត្ថកិច្ចខណ្ឌបានចុះមកដល់កន្លែងកើតហេតុ ដោយសារតែនៅទីនោះ មិនមានភ្លើងពិបាកធ្វើការត្រួតពិនិត្យសាកសពពេក។

លុះព្រឹកឡើងថ្ងៃទី១៥ ខែឆ្នាំដដែល សមត្ថកិច្ចបានចុះមកដល់កន្លែងកើតហេតុម្តងទៀត ដើម្បីការស្រាវជ្រាវ និងពិនិត្យជុំវិញនៅកន្លែងកើតហេតុ។ ក្រោយពីសមត្ថកិច្ចធ្វើកោសវិច័យរួចមក បានរកឃើញថា សពស្រ្តីរងគ្រោះស្លាប់ ដោយសារតែជនសង្ស័យវាយពីក្រោយចំលលាដ៍ក្បាល នៅលើផ្ទៃមុខមានស្នាមជាំ និងធ្មេញខាងឆ្វេងមានការបាក់។

សមត្ថកិច្ចបានបញ្ជាក់ថា សាកសពស្ត្រីរងគ្រោះខាងលើមានអាយុប្រហែល៣៨ឆ្នាំ ដោយនៅមិនទាន់បានស្គាល់អត្តសញ្ញាណនៅឡើយទេ ហើយសពស្ត្រីខាងលើពាក់អាវយឺតពណ៌ស ខោសាច់ក្រណាត់ពណ៌ខ្មៅ មានកាបូបស្ពាយពណ៌ផ្កាឈូក១ និងស្បែកជើងនៅក្បែរសាកសពផង។

បច្ចុប្បន្នសពស្ត្រីរងគ្រោះខាងលើ ត្រូវបានដឹកយកទៅតម្គល់នៅវត្តសំបូរមាស នៅក្នុងខណ្ឌដង្កោ ដើម្បីរង់ចាំសាច់ញាតិ យកទៅធ្វើបុណ្យតាមប្រពៃណី៕