Post News Media ព័ត៌មានជាតិ ល្បែងឆ្នោត បើ...

ល្បែងឆ្នោត បើកឲ្យលេង យ៉ាងអានាធិបតេយ្យ នៅក្រុងសៀមរាប

សៀមរាប: ​ល្បែង​ឆ្នោត​សៀម ​និង​យួន ​ត្រូវ​បាន​បើក​ឲ្យ​លេង​ដោយ​ចំហ​ នៅ​ក្រុង​សៀមរាប​ ប្រៀប​ដូចជា ​ផ្សារ​ត្រី​អញ្ចឹង​ហើយ ​ករណីនេះ​គេ​ទម្លាយ​មក​ថា​ បាន​បង់លុយ​ឲ្យ​សមត្ថកិច្ច​អស់​រាប់​លាន​រៀល​ក្នុង​១​ខែៗ​។

​មតិ​សាធារណជន​ បាន​និយាយ​តគ្នាថា​ ល្បែង​ឆ្នោត​សៀម និង​ឆ្នោត​យួន​នេះ ​ត្រូវ​បាន​ក្រុម​អ្នកលេង​ក្នុង​ ខេត្តសៀមរាប​ សប្បាយចិត្ត​ និង​បើក​ឲ្យ​គេ​ចាក់ ​ដោយ​សេរី​ ទៅតាម​តូច​ឬ​ធំ​ ស្រេច​តែ​ចិត្ត​ក៏​មេ​ចាំ​ទទួល​ជានិច្ច​។

ប្រភព​​ដដែល​ បាន​ឲ្យ​ដឹង​ទៀត​ថា ​ការបើក​ឲ្យ​លេងឆ្នោត​ដោយ​សេរី​ នៅក្នុង​ខេត្តសៀមរាប​នេះដែរ ​គឺ ដោយមាន​ខ្នងបង្អែក​ជា​សមត្ថកិច្ច​ធំៗ​ មួយចំនួន ​បាន​ប្រើ​ឲ្យ​មន្ត្រី​ក្រោមឱវាទ​ចំនួន​២​នាក់​ ជា​អ្នកដើរ​ប្រមូល​សេដ្ឋកិច្ច​ ឡើង​ឲ្យ​ជា​រៀងរាល់ថ្ងៃ​។ ​ចំពោះ​ទីតាំង​ដែល​បើក​ឲ្យ​លេង​ដោយ​សេរី​នោះ​គឺ​នៅ​ខាង​ក្រោយ​ផ្សារលើ ​ក្នុង​ផ្សារ​សាមគ្គី​ ជិត​វត្ត​ពោធិ៍​លង្កា ​ផ្សារ​ដើម​ក្រឡាញ់​ ដែល​មាន​មេ​ធំ​ចំនួន​បីនាក់​មកពី​ភ្នំពេញ​។

ប្រភពបន្តថា ​បន្ទាប់ពី​មានការ​បើក​ឲ្យ​លេងល្បែង​ឆ្នោត​គ្រប់​ប្រភេទ​ក្នុង​ខេត្ត​ទេសចរណ៍​នេះ​ហើយ​ទើប​គេ​សង្កេតឃើញ ​មាន​ករណី​ ចោរកម្ម​ផ្សេងៗ​កើតមាន​ជា​ហូរហែ ​ហើយ​ករណីនេះ​ពលរដ្ឋ​មាន​ក្តី​កង្វល់​ពី​សេចក្តីសុខ​សុវត្ថិភាព ​របស់​ពួកគាត់​យ៉ាងខ្លាំង ​បន្ទាប់ពី​ឃើញ​សភាព​យ៉ាង​ដូច្នេះ​។ បច្ចុប្បន្ននេះ ​ល្បែង​ឆ្នោត​ត្រូវ​បាន​គេ​ធ្វើ​ច្បាប់​ឲ្យ​ថា ​ជា​ឆ្នោត​ខ្មែរ​តែ​ផ្ទុយទៅវិញ​មាន​លក់​តែ​ឆ្នោត​សៀម​និង​យួន​ទៅវិញ​។

នា​ព្រឹក​ថ្ងៃទី​១៥ ខែមិថុនា ​២០១៦នេះ​ លោក​ឧ​ត្ត​ម​សេនីយ៍​ត្រី ប៉ោ វណ្ណ​និ​ត ​មេ​បញ្ជាការ​កងរាជ​អាវុធ​ហត្ថ​ខេត្ត​ បាន​ឲ្យ​ដឹង​​ថា ករណី​ល្បែង​ឆ្នោត​នេះ​ គឺ​លោក​នឹង​សុំ​គោល​ការ​ទៅ​ខេត្ត​សិន​រួច​នឹង​ដាក់​កម្លាំង​ចុះ​បង្ក្រាប​តែម្តង​។

ជុំវិញ​ករណី​នេះដែរ មជ្ឈដ្ឋាន​ពលរដ្ឋ មានការ​ទន្ទឹងរង់ចាំ​មើល​ហើយ​មើល​ទៀតថា​ តើ​លោក​ឃឹម ប៊ុន​សុង​ អភិបាលខេត្ត​សៀមរាប អាច​បញ្ជាឲ្យ​កងកម្លាំង​ក្នុង​ខេត្ត​បង្ក្រាប​បាន​ឬ​យ៉ាងណា​ឬក៏​ទុក​បន្សល់​ឲ្យ​កូនចៅ​មាន​ចំហាយ​ពី​បទ​ល្មើស​ខ្លះ​? ​ព្រោះ​អី​មួយ​រយ:នេះ ​គេ​ឃើញ​ចាប់​មួយ​ដង្ហើម​ចង្រិត​ប៉ុណ្ណោះ​។

សូម​បញ្ជាក់ថា​ ​ប្រមុខ​នៃ​រាជរដ្ឋាភិបាល​បាន​ធ្វើការ​ព្រមាន​យ៉ាង​ធ្ងន់ៗ​ឲ្យ​មន្ត្រី​និង​កង​កម្លាំងប្រដាប់អាវុធ​ដកខ្លួន​ ចេញ​ឲ្យ​ឆ្ងាយ​ពី​បទ​ល្មើស​ផ្សេងៗ​ដូចជា​ល្បែង​ស៊ីសង​ បទ​ ល្មើស​ព្រៃឈើ ជាដើម៕

Loading...