កំពង់ឆ្នាំងៈ កាលពីម៉ោង៣និង៤៥នាទីល្ងាចថ្ងៃទី១៤ ខែមិថុនា ឆ្នាំ២០១៦ នគរបាលព្រហ្មទណ្ឌកំរិតស្រាលខេត្ត ចុះបង្ក្រាបវង់ល្បែងស៊ីសងមួយកន្លែងក្នុងភូមិស្វាយជ្រុំថ្មី ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។

លទ្ធផលបង្ក្រាបសមត្ថកិច្ចចាប់បានបុរសជាម្ចាស់ផ្ទះម្នាក់ ឈ្មោះ ខេង គុន អាយុ៣៥ឆ្នាំ រួមជាមួយវត្ថុតាងរួមមាន៖ ម៉ូតូ១២គ្រឿង រថយន្ត១គ្រឿងម៉ាកតូយូតាតាកូម៉ា ពាក់ស្លាកលេខភ្នំពេញ2V-3493 លុយខ្មែរ៩០ម៉ឺនរៀល លុយដុល្លា២២ដុល្លារ បៀរ២ហ៊ូ កម្រាលវាយបៀរ១កេស ដាក់លុយ១ ក្រដាសកត់ត្រាលេខសម្រាប់ចាក់កន្ទុយលេខ១សន្លឹក ដងកឺជាង១០ដើម និងគ្រប់ប៊ីយ៉ែ មួយចំនួនទៀត។ ដោយឡែកម្ចាស់ម៉ូតូ និងរថយន្តដែលជាអ្នកមកលេងល្បែងស៊ីសង បាននាំគ្នារត់គេចខ្លួនអស់ហើយ ដោយទុកម៉ូតូនិងរថយន្តខ្លួនចោល ខណៈសមត្ថកិច្ចចុះទៅបង្ក្រាប។

បច្ចុប្បន្នម្ចាស់ផ្ទះ និងវត្ថុតាងទាំងអស់ ត្រូវបានសមត្ថកិច្ចជញ្ជូនយកមករក្សាទុកនៅក្នុងស្នងការដ្ឋាននគរបាលខេត្តកំពង់ឆ្នាំង ដើម្បីកសាងសំណុំរឿងតាមនីតិវិធី បញ្ជូនទៅកាន់សាលាដំបូងខេត្តចាត់ការបន្តតាមផ្លូវច្បាប់៕