​ភ្នំពេញៈ ពិតជាខ្លាំងមែនក្រុមលោកចោរនេះ ប្រើរយៈពេលតែ១ម៉ោងសោះចូលធ្វើសកម្មភាពលួចយកម៉ូតូពីក្នុងផ្ទះជួលរបស់តារាភាពយន្តជើងចាស់គឺអ្នកនាង កែវ កល្យាណ អស់ចំនួន៦គ្រឿងហើយគេចខ្លួនដោយសុវត្ថិភាព។

ករណីនេះកើតឡើងកាលពី ថ្ងៃទី២ ខែមីនា ឆ្នាំ ២០១៨ វេលាម៉ោង៦និង២០នាទីព្រឹក ស្ថិតក្នុងផ្ទះជួលលេខ៣៩៣ ភូមិទំនប់១ សង្កាត់ភ្នំពេញថ្មី ខណ្ឌសែនសុខ។

ប្រភពពីកន្លែងកើតហេតុបានឲ្រដឹងថា មុនពេលកើតហេតុវេលាម៉ោងប្រហែល៣យប់ ថ្ងៃទី២ ខែមីនា ឆ្នាំ២០១៨ អ្នកជួលបន្ទប់ស្នាក់នៅបានត្រឡប់មកពីធ្វើការវិញឃើញទ្វាររបងអត់ចាក់សោក៏ទូរសព្ទទៅម្ចាស់ផ្ទះប៉ុន្តែម្ចាស់ផ្ទះពុំបានលើកគាត់ក៏ចូលសម្រាកទៅ។លុះព្រឹកឡើងនៅពេលជនរងគ្រោះជាម្ចាស់ម៉ូតូចុះមកក្រោមដើម្បីទៅធ្វើការស្រាប់តែបាត់ម៉ូតូអស់ចំនួន៦គ្រឿងទើបបង្កការភ្ញាក់ផ្អើលតែម្តងនិងរាយការណ៍ប្រាប់សមត្ថកិច្ចឲ្យចុះមកពិនិត្យ។

សមត្ថកិច្ចប្រាប់ថាម៉ូតូដែលក្រុមជនសង្ស័យលួចយកទៅនោះចំនួន៦គ្រឿងទី១ម៉ាក ស៊ុយស៊ីគីវ៉េវ ពណ៌ខ្មៅ ស៊េរីឆ្នាំ២០១៦ គ្មានស្លាកលេខ,ទី២ម៉ាក គុប ពណ៌ទឹកប៊ិច ពាក់ស្លាកលេខ ភ្នំពេញ1K2553,ទី៣ម៉ាក ស្គុបពី ពណ៌ស ស៊េរីឆ្នាំ២០១៥ ពាក់ស្លាកលេខ ភ្នំពេញ1FB2902,ទី៤ម៉ាកស៊ុយស៊ីគីវ៉េវ ពណ៌ក្រហម ពាក់ស្លាកលេខ កំពង់ចាម1D4311(គ្មានពន្ធ) ទី៥ម៉ាក ហុងដា សេ១២៥ ពណ៌គ្មានស្លាកលេខ។ និងទី៦ម៉ាក ហុងដាសេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ព្រៃវែង1K1431។

អ្នកនាង កែវ កល្យាណ ដែលជាម្ចាស់ផ្ទះបានប្រាប់សមត្ថកិច្ចថា បន្ទប់ជួលគាត់មានកន្លែងសម្រាប់ដាក់ម៉ូតូរបស់អ្នកជួលដោយមានសោរបងចាក់ទាំងទ្វារមុខនិងកន្លែងដាក់ម៉ូតូ ស្រាប់តែព្រឹកឡើងម៉ោងកើតហេតុខាងលើក៏មានការភ្ញាក់ផ្អើលបាត់ម៉ូតូអស់ដល់ទៅ៦គ្រឿងតែម្តង ហើយគាត់ក៏រាយការណ៍ប្រាប់សមត្ថកិច្ច។
ពាក់ព័ន្ធនិងករណីខាងលើនេះលោក ហួរ ម៉េងវ៉ាង អធិការនគរបាលខណ្ឌសែនសុខ បានឲ្យដឹងថា លោកបានចុះពិនិត្យដល់កន្លែងកើតហេតុហើយនិងឆែកមើលកាំមេរ៉ាសុវត្ថិភាពដើម្បីកំណត់មុខសញ្ញាតាមចាប់ក្រុមជនសង្ស័យ។

លោកអធិការបញ្ជាក់ថា នេះជាករណីលួចទេមិនមែនករណីគាស់ឬឆ្កិះសោយកម៉ូតូទេ ព្រោះក្រុមជនសង្ស័យមានកូនសោចាក់មេសោទាំងមុខទាំងក្រោយ ឬអាចមានននុកក្នុងឲ្យដៃទើបក្រុមជនសង្ស័យមានកូនសោសម្រាប់ចាក់ដូចច្នេះ។
ហើយលោកកំពុងធ្វើការស្រាវជ្រាវតាមចាប់ជនល្មើសយកមកផ្តន្ទាទោសទៅតាមច្បាប់៕