ភ្នំពេញ: នៅព្រឹកថ្ងៃទី១៧ ខែមិថុនា ឆ្នាំ២០១៦នេះ លោក កោ វណ្ឌី ចៅក្រមស៊ើបសួរសាលាដំបូងរាជធានីភ្នំពេញ បានបង្គាប់ឱ្យអនុរក្សពន្ធនាគារព្រៃសនាំយកជនជាប់ចោទឈ្មោះ ហុង សុខហួរ មកសាកសួរបន្ថែមទៀតពាកព័ន្ធនឹងសំណុំរឿង ក្លែងផែនទីព្រំដែនរវាងកម្ពុជា និងវៀតណាម បង្ហោះតាមបណ្តាញសង្គមហ្វេសប៊ុក កាលពីពេលន្លងទៅ។
ការបង្គាប់ឱ្យនាំខ្លួនជនជាប់ចោទរូបនេះមកសាកសួរបន្ថែមពីសំណាក់ចៅក្រមស៊ើបសួរ បានធ្វើឡើងនៅក្រោយពេលដែលលោក ជូង ជូងី មេធាវីការពារសិទ្ធិជនជាប់ចោទបានព្យាយាម ដាក់ពាក្យប្តឹងសុំនៅក្រៅឃុំឱ្យកូនក្តីលោក ទៅតុលាការជាន់ខ្ពស់ ប៉ុន្តែមិនដែលបានសម្រេច។
គួររំឮកថា លោក ហុង សុខហួរ សមាជិកព្រឹទ្ធសភារបស់គណ:បក្សសមរង្ស៊ី ត្រូវបានលោក កោ វណ្ឌី ចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនជាបណ្តោះអាសន្ននៅពន្ធនាគារព្រៃស កាលពីព្រឹកថ្ងៃទី១៦ ខែសីហា ឆ្នាំ ២០១៥កន្លងទៅ។
លោក ហុង សុខហួរ ត្រូវបានលោក មាស ច័ន្ទពិសិដ្ឋ តំណាងអយ្យការ សម្រេចចោទប្រកាន់ពីបទ ក្លែងបន្លំ ឯកសារសាធារណ: បទប្រើប្រាស់ឯកសារសាធារណ:ក្លែង និង បទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម យោងតាមមាត្រា ៦២៩ មាត្រា៦៣០ និង មាត្រា ៤៩៥ នៃក្រមព្រហ្មទណ្ឌ ពាក់ព័ន្ធករណគការក្លែងសន្ធិសញ្ញា ព្រំដែនកម្ពុជាវៀតណាម ឆ្នាំ១៩៧៩ ត្រង់ មាត្រា៤ និងយក ឯកសារក្លែងនោះទៅបង្ហោះលើទំព័រហ្វេសប៊ុករបស់ លោក សម រង្ស៊ី។
លោក ហុង សុខហួរ ត្រូវបានកម្លាំងសមត្ថកិច្ចឃាត់ខ្លួន កាលពីព្រឹក ថ្ងៃទី១៥ ខែសីហា ឆ្នាំ២០១៥ នៅផ្ទះ របស់លោក យន្ត ថា រ៉ូ អ្នកតំណាងរាស្ត្រ មណ្ឌលខេត្តបន្ទាយមានជ័យ របស់ គណបក្សសង្គ្រោះជាតិ នៅក្នុងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។ ក្រោយមកលោក ហុង សុខហួរ ត្រូវបានកម្លាំងសមត្ថកិច្ច បញ្ជូនខ្លួន ទៅតុលាការនៅរសៀលថ្ងៃដដែល ដើម្បីបន្តនីតិវិធី៕
មតិយោបល់