ភ្នំពេញ: មានហេតុការណ៍ភ្ញាក់ផ្អើលមួយបានកើតឡើង ដោយមានយុវជន២នាក់ បានជិះម៉ូតូគេចពីសមត្ថកិច្ចព្រោះតែជិះម៉ូតូអត់ពាក់មួកសុវត្ថិភាព បែរជាជ្រុលទៅបុករបងទ្វាផ្ទះប្រជាពលរដ្ឋបណ្តាលឲ្យរលំចំក្បាលរយះហូរឈាម។
ករណីនេះកើតឡើងនៅម៉ោង១និង១៥នាទី យប់ឈានចូលថ្ងៃទី៤ ខែមីនា ឆ្នាំ២០១៨ ចំណុចផ្លូវបេតុង ភូមិភ្នាត សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
ប្រភពព័ត៌មានបានឲ្យដឹងថា មុនពេលកើតហេតុ សមត្ថកិច្ចបានចុះល្បាតក្នុងមូលដ្ឋាន ស្រាប់តែឃើញយុវជន២នាក់ ជិះម៉ូតូអត់ពាក់មួកសុវត្ថិភាពទាំង២ ដោយមានការសង្ស័យ ទើបហៅឲ្យឈប់ តែបែរជាបន្ថែមល្បឿនបើកគេច ទើបសមត្ថកិច្ចដេញតាម ស្រាប់តែម៉ូតូយុវជនខាងលើ បានជ្រុលទៅបុកនឹងរបងទ្វាផ្ទះរបស់ប្រជាពលរដ្ឋបណ្តាលឲ្យរបួសម្នាក់ ចំណែកម្នាក់ទៀតរត់គេចខ្លួនបាត់ស្រមោល។
ក្រោយសាកសួរនិងឆែកឆេរទើបដឹងថា យុវជនខាងលើនេះមិនពាក់ពន្ធ័នឹងបទល្មើសអ្វីឡើយ គ្រាន់តែពួកគេផឹកស្រាអស់២កំប៉ុង ហើយខ្ចីម៉ូតូគេមកជិះដើរលេង តែអត់បានពាក់មួក លុះឃើញសមត្ថកិច្ចភ័យពេកក៏បើកម៉ូតូគេចទៅបុកនឹងរបងផ្ទះគេតែម្តង ទើបសមត្ថកិច្ចអប់រំឲ្យត្រឡប់ទៅផ្ទះវិញ៕
មតិយោបល់