បាត់ដំបងៈ ប្ដី-ប្រពន្ធ ពីរនាក់ បើកបរធ្វេសប្រហែស ជិះម៉ូតូឌុបគ្នា បើកបរក្នុងល្បឿនលឿនដល់ផ្លូវកោង ជាន់ហ្វ្រាំងបង្ខំដួលចូលក្រោមកង់រថយន្ត កិនស្លាប់ប្ដី ប្រពន្ធរងរបួសធ្ងន់ធ្ងរ ត្រូវបានបញ្ជូនទៅសង្គ្រោះនៅមន្ទីរពេទ្យ។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៩ និង៣០នាទីព្រឹក ថ្ងៃទី១៧ ខែមិថុនា ឆ្នាំ២០១៦ នៅត្រង់ចំនុចផ្លូវវាងក្រុង ស្ថិតក្នុងភូមិអូរចារ សង្កាត់អូរចារ ក្រុងបាត់ដំបង ខេត្តបាត់ដំបង ។
អ្នកឃើញហេតុការណ៍ បានប្រាប់ឲ្យដឹងថា នៅមុនពេលកើតហេតុគេឃើញមានម៉ូតូ១គ្រឿងម៉ាកឃ្លីក ពណ៌ក្រហម គ្មានស្លាកលេខ ជិះគ្នាពីរនាក់ ស្ថិតក្នុងល្បឿនយ៉ាងលឿន ដល់ចំណុចកើតហេតុ គឺផ្លូវមានសភាពជាប្រភេទផ្លូវកោង គឺអ្នកបើកបរម៉ូតូ បានចាប់ហ្វ្រាំងបង្ខំយ៉ាងខ្លាំង ធ្វើឲ្យម៉ូតូដួលទាំងជំហរ ចៃដន្យនៅពេលនោះ ក៏មានរថយន្តក្រឡុកស៊ីម៉ងត៍ មួយគ្រឿង ពាក់ស្លាកលេខ បាត់ដំបង 5A-0010 បើកបរក្នុងទិសដៅច្រាស់គ្នា មកដល់ល្មម កិនទៅលើបុរសជាប្តី ស្លាប់ ភ្លាមមួយរំពេច នៅនឹងកន្លែងកើតហេតុ ប្រពន្ធរងរបួសធ្ងន់។ ប្រភពបានបន្តថា បុរសជាប្ដីស្លាប់ មានឈ្មោះ មួន វត្ថា ហៅជា អាយុ៣៦ឆ្នាំ ចំណែប្រពន្ធដែលជិះនៅខាងក្រោយមានឈ្មោះ ម៉ាប់ អាយុ៣២ឆ្នាំ ពួកគេរស់នៅភូមិស្វាយជ្រុំ ឃុំជ្រៃ ស្រុកថ្មគោល។
ស្ត្រីជាភរិយា ដែលរងរបួសធ្ងន់ ត្រូវបានបញ្ជូនទៅសង្គ្រោះនៅឯមន្ទីរពេទ្យ។ ចំណែកអ្នកបើកបររថយន្ត បានរត់គេចខ្លួនបាត់ស្រមោល មុនពេលដែលសមត្ថកិច្ចចរាចរណ៍ចុះទៅដល់។ វត្ថុតាងទាំង២ ត្រូវសមត្ថកិច្ច នាំយកទៅរក្សាទុកនៅការិយាល័យជាបណ្តោះអាសន្នរង់ចាំធ្វើការដោះស្រាយជាក្រោយ។ ដោយឡែក សពត្រូវបានប្រគល់ទៅឲ្យក្រុមគ្រួសារសាច់ញាតិ នាំយកទៅធ្វើបុណ្យតាមប្រពៃណី៕
មតិយោបល់