កណ្តាលៈ សមត្ថកិច្ចបានប្រាប់ Post News ថា មានករណីគ្រោះថ្នាក់ចរាចរណ៍ រវាងម៉ូតូនិងម៉ូតូ បណ្ដាលឲ្យស្លាប់២នាក់(ប្រុស)។
កើតហេតុនៅថ្ងៃអាទិត្យ ៩កើត ខែចេត្រ ឆ្នាំរកា នព្វស័ក ព.ស២៥៦១ ត្រូវនិងថ្ងៃទី២៥ ខែមីនា ឆ្នាំ២០១៨ វេលាម៉ោង៦និង៣០នាទី នៅលើកំណាត់ផ្លូវលេខ១១៥ ចំណុចលើស្ពានព្រែកសំរោង ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល។

មុនពេលកើតហេតុមានម៉ូតូ មួយគ្រឿង ម៉ាកSuzuki Smash Revo ពណ៌ខៀវ ពាក់ស្លាកលេខ កណ្តាល1D-1043 បើកបរដោយឈ្មោះ លឹម លី ភេទប្រុស អាយុ៣៥ឆ្នាំ (មិនពាក់មួកសុវត្ថិភាពតែកញ្ចក់មើលក្រោយ)(ស្លាប់) មានទីលំនៅបច្ចុប្បន្ន ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ បើកបរក្នុងទិសដៅពីលិចទៅកើត ពេលបើកបរមកដល់ចំណុចកើតហេតុខាងលើបានបុកម៉ូតូម៉ាកHonda Click ពណ៌ស ពាក់ស្លាកលេខ កណ្តាល 1X-9922 បើកបរក្នុងទិសដៅពីកើតមកលិច អ្នកបើកបរឈ្មោះវៀង ថាន់តាយ ភេទប្រុស អាយុ១៩ឆ្នាំ ជនជាតិវៀតណាម(ស្លាប់)(គ្មានកញ្ចក់មើលក្រោយនឹងមិនពាក់មួកសុវត្ថិភាព) មានទីលំនៅក្នុងភូមិព្រែកគយ ឃុំព្រែករុន ស្រុកស្អាង ខេត្តកណ្តាល។

បណ្តាលឲ្យអ្នកបើកបរម៉ូតូទាំង២ស្លាប់នៅកន្លែងកើតហេតុ ត្រូវបានក្រុមគ្រួសារយកទៅធ្វើបុណ្យតាមប្រពៃណីរៀងខ្លួន។ ចំណែកមធ្យោបាយទាំង២ ត្រូវបានសមត្ថកិច្ចយកមករក្សាទុកនៅអធិការដ្ឋានក្រុងតាខ្មៅ ដើម្បីចាត់ចែងតាមនិតិវិធីនៃច្បាប់។

មូលហេតុ បណ្តាលមកពីអ្នកបើកបរម៉ូតូSmashបើកបរលឿនខ្វះការប្រុងប្រយ័ត្ន៕