​កំពង់ស្ពឺ: យោងតាមការជូនដំណឹងរបស់ស្នងការដ្ឋាននគរបាល ខេត្ដកំពង់ស្ពឺ សូមធ្វើការប្រកាសជូនដំណឹងដល់សាធារណ:ជន ទាំងអស់ដែលបានបាត់ម៉ូតូនាពេលកន្លងមក មិនថានៅទីកន្លែងណា ខេត្ដណាទេ សូមអញ្ញើញពិនិត្យភិនភាគតាមលក្ខណ:សម្គាល់ នៃប្រភេទម៉ូតូរបស់អស់លោក លោកស្រី ដែលក្រុមការងារបានផ្សពផ្សាយ។

សូមបញ្ជាក់ថាក្រោយប្រតិបត្ដិការ បង្រ្កាបមុខសញ្ញាទទួលផលចោរកម្ម និងទីតាំងកែច្នៃម៉ូតូមិនប្រក្រតី មួយកន្លែង នៅស្រុកគងពិសី កាលពីថ្ងៃសុក្រ ទី២៣ ខែមីនា ឆ្នាំ២០១៨ ដោយកម្លាំងការិយាល័យជំនាញព្រហ្មទណ្ឌខេត្ដ និងកម្លាំងអធិការដ្ឋាននគរបាលស្រុកគងពិសី ប្រតិបត្តិការស្រាវជ្រាវ និងបង្រ្កាបជាលទ្ធផលរកឃើញម៉ូតូចំនួន៨គ្រឿង ដែលមិនមានឯកសារត្រឹមត្រូវ លក្ខណ:កែឆ្នៃខុសប្រក្រតី ពីធាតុដើមរបស់វា(ម៉ូតូ)។

សូមជូនភ្ជាប់តារាងបញ្ជីប្រភេទម៉ូតូ និងរូបភាពម៉ូតូដែលដកហូត បានចំនួន៨គ្រឿង ករណីពិនិត្យឃើញថាម៉ូតូខាងលើមានលក្ខណ:សង្ស័យ ថាជាកម្មសិទ្ធិរបស់លោកអ្នក ដែលបានបាត់ដោយមូលហេតុផ្សេងៗ សូមអញ្ញើញមកធ្វើការទំនាក់ទំនងជាមួយក្រុមការងាររបស់ស្នងការដ្ឋាន នគរបាលខេត្ដ (ការិយាល័យព្រហ្មទណ្ឌកម្រិតស្រាលនៃស្នងការ ដ្ឋាននគរបាលខេត្ដកំពង់ស្ពឺ)គ្រប់ពេលម៉ោងធ្វើការ៕