បាត់ដំបងៈ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តហាយឡែនឌ័រ បានបើកបត់ត្រឡប់ក្រោយ ត្រូវម៉ូតូសង់បុក រងរបួសស្រាល។

ហេតុការណ៍នេះកើតឡើងនៅម៉ោង៨និង៣០នាទីយប់ថ្ងៃទី៣០ ខែមីនា ឆ្នាំ២០១៨ ត្រង់ចំណុចផ្លូវចូលព្រលានយន្តហោះ ស្ថិតក្នុងភូមិបែកចានថ្មី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។

ដំបូងឡើយគេឃើញរថយន្តម៉ាក ហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2AS-8406 បើកបរដោយឈ្មោះ ឆុន គឹមឆេង ភេទប្រុស អាយុ ៣២ ឆ្នាំ មានទីលំនៅភូមិក្បាលទំនប់ សង្កាត់ក្បាលទំនប់ ខណ្ឌមានជ័យ ធ្វើដំណើរស្របទិសគ្នាពីលិចទៅកើត ដល់ត្រង់ចំណុចខាងលើរថយន្តបានបត់ត្រឡប់ក្រោយ រួចក៏ស្រាប់តែមានម៉ូតូ១ គ្រឿង ម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ បាត់ដំបង 1S-8176 ជិះក្នុងល្បឿនលឿនបានបុកពីក្រោយរថយន្តបណ្តាលឲ្យរបួសស្រាលទាំង៣នាក់តែម្តង៕