Post News Media ព័ត៌មានជាតិ The Voice Cam...

The Voice Cambodia នឹងកក្រើកក្នុងវគ្គបញ្ចប់យប់នេះ

ភ្នំពេញ: នៅយប់ថ្ងៃទី១៩ មិថុនា កម្មវិធី The Voice Cambodia របស់ទូរទស្សន៍ហង្សមាសនឹងត្រូវដល់វគ្គបញ្ចប់។ បេក្ខជន បេក្ខនារីចំនួន៤រូបសុទ្ធតែបង្ហាញក្ដីសង្ឃឹមរៀងខ្លួន សម្រាប់កាន់ពាននៅកម្មវិធីនេះ បើទោះជាក្នុងចំណោមពួកគេ នឹងមានតែម្នាក់ទទួលបានឱកាស។

មន្ត្រីពីហង្សមាសបានអះអាងថា វេទិការការប្រកួតបញ្ចប់យប់នេះ នឹងមានវត្តមានចូលរួមដោយមន្ត្រីជាន់ខ្ពស់ពីក្រសួងព័ត៌មាន និងក្រុមហ៊ុនធំៗដូចមុនដដែល ដោយអ្នកទស្សនានឹងពេញសាលដែលអាចនិយាយបានថា អ្នកមិនមានសំបុត្រទស្សនានឹងមានចំនួនច្រើននាក់។

កម្មវិធីយប់នេះត្រូវបានគេចាប់អារម្មណ៍ជាងមុនដោយសារតែCoach ទាំង៤របស់កម្មវិធីក៏នឹងបកស្រាយចំរៀងផងដែរ អមដោយការបកស្រាយចម្រៀងរបស់៤នាក់ចុងក្រោយ។ បេក្ខជនដែលត្រូវប្រកួតដណ្ដើមពានយប់នេះរួមមាន លោកថែល ថៃ កូនក្រុមរបស់ឱក សុគន្ធកញ្ញា បេក្ខនារី ឈីន រតន: កូនក្រុមរបស់លោកណុប បាយ៉ារិទ្ធី បេក្ខជន ឃី សុឃុន កូនក្រុមរបស់ឆន សុវណ្ណរាជ និងបេក្ខនារី សាន ស្រីឡៃ កូនក្រុមរបស់ពេជ្រ សោភា។ មកទល់នឹងវិនាទីដែលការប្រកួតហៀបនឹងត្រូវចាប់ផ្ដើមនេះ មានការជជែកដេញដោលកាន់តែខ្លាំង ដើម្បីទស្សន៍ទាយថាបេក្ខជនរូបណា បេក្ខនារីរូបណា និងគ្រូបង្វឹករូបណា ដែលនឹងទទួលបានកិត្តិយសនៅវគ្គចុងក្រោយ។

បើទោះជាបេក្ខជន ថែល ថៃ និងបេក្ខនារី ឈីន រតន: ត្រូវគេមើលឃើញមានប្រៀបជាងគេសម្រាប់កាន់ពាន ក៏បេក្ខនារី សាន ស្រីឡៃ និងបេក្ខជន ឃី សុឃុន ក៏មិនអាចមើលស្រាលសមត្ថភាពបានដែរសម្រាប់យប់នេះ។ ពានរង្វាន់ម្ចាស់ពាន The Voice Cambodia វគ្គ២ នឹងត្រូវរកឃើញអ្នកទទួលនៅក្នុងយប់នេះ ហើយជ័យលាភីរបស់អ្នកឈ្នះ ក៏ទំនងជាធ្វើឲ្យអ្នកតាមដានពេញចិត្តសម្រាប់សមត្ថភាពបង្ហាញនៅក្នុងរាត្រីនេះផងដែរ។

យ៉ាងណាមិញ ការប្រកួតផ្ដាច់ព្រ័ត្រក៏ត្រូវគេប៉ាន់ស្មានថានឹងការឃោសនាពាណិជ្ជកម្មរយ:ពេលយូរៗផងដែរ ទើបមនុស្សជាច្រើនបានសម្រុកទៅទិញសំបុត្រទស្សនាដោយផ្ទាល់នៅផ្សារទំនើបអ៊ីអន ត្រូវត្រូវបានប្រភពច្បាស់ការបញ្ជាក់ថាសំបុត្រលក់អស់ទៅហើយ៕

Loading...