ភ្នំពេញៈ នារីម្នាក់ ជិះម៉ូតូទៅទិញម្ហូបនៅឯផ្សារ ពេលដែលចេញមកវិញ ចោរលួចម៉ូតូបាត់។
ហេតុការណ៍ខាងលើបង្កឲ្យមានការភ្ញាក់ផ្អើលកាលពីវេលាម៉ោង៦និង២៥នាទីព្រលប់ ថ្ងៃទី៣ ខែមេសា ឆ្នាំ២០១៨ ទីតាំងស្ថិតនៅមុខរោងចក្រអាមេរិកកាំងជាប់ផ្លូវវេងស្រេង នៅក្នុងភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
នារីដែលជាជនរងគ្រោះមានឈ្មោះ សុន ស្រីណេត អាយុ២៣ឆ្នាំ មុខរបរកម្មករោងចក្រ ស្នាក់នៅផ្ទះជួលភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅភូមិជម្រៅ ឃុំតាំយ៉ាប ស្រុកព្រៃកប្បាស ខេត្តតាកែវ ។ ចំណែកឯម៉ូតូដែលបាត់នោះម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1FP-9868។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុរូបនាងទើបចេញពីធ្វើការរោងចក្រទៅផ្សារនៅមុខរោងចក្រអាមេរិកកាំងមានមនុស្សច្រើនពេកនាងបានទៅបន្ទប់ជួលសិនរួចត្រឡប់មកទិញសាច់ជ្រូកដើម្បីធ្វើម្ហូបហើយបានជិះម៉ូតូទៅទិញនៅមុខរោងចក្រអាមេរិកកាំងបានទុកម៉ូតូនៅខាងមុខរោងចក្រដោយចាក់សោ.កតែមិនបានបិទសន្ទះទេ ហើយចូលទៅទិញសាច់ជ្រូករយៈពេលប្រមាណ៧នាទី បានទិញរួចរាល់ហើយបានត្រឡប់ទៅកន្លែងទុកម៉ូតូវិញស្រាប់តែបាត់ម៉ូតូតែម្តង។ រូបគាត់បានសួរនៅជិតកន្លែងកើតហេតុមាននារីម្នាក់បានឃើញជនសង្ស័យម្នាក់អាយុប្រមាណជិត៤០ឆ្នាំបានជិះម៉ូតូចេញភ្លាមផងដែរ ។
នារីរងគ្រោះបានបន្តទៀតថា ជារៀងរាល់ថ្ងៃគាត់តែងមកពីធ្វើការហើយមកទិញម្ហូបនៅមុខរោងចក្រខាងលើជារៀងរាល់ថ្ងៃដោយមិនដែលមានបញ្ហាឡើយតែប្រជាពលរដ្ឋនៅកន្លែងកើតហេតុបាននិយាយថា ទីតាំងខាងលើតែងតែបាត់ម៉ូតូជាច្រើនលើកមកហើយពេលខ្លះមួយថ្ងៃបាត់អស់២គ្រឿងក៏មានដែរ ។
ក្រោយពេលកើតហេតុជនរងគ្រោះបានទៅដាក់ពាក្យបណ្ដឹងភ្លាមៗនៅប៉ុស្តិ៍នគរបាលរដ្ឋបាលចោមចៅ២ ដើម្បីឲ្យសមត្ថកិច្ចជួយស៊ើបអង្កេត និងតាមឃាត់ខ្លួនជនសង្ស័យមកផ្តន្ទាទោសតាមច្បាប់ ៕
មតិយោបល់