កំពង់ចាមៈ ករណីលង់ទឹក បណ្ដាលឲ្យមនុស្សក្មេងចាស់ចំនួន ៤ នាក់ស្លាប់យ៉ាងអាណោចអាធ័ម កាលពីវេលាម៉ោងប្រហែល៦ ល្ងាច នៅថ្ងៃទី១៤ ខែមេសា ឆ្នាំ២០១៨ នៅចំណុចក្បាលកោះ ទល់មុខភូមិពាមជីកង​ ឃុំពាមជីកង ស្រុកកងមាស ខេត្តកំពង់ចាម។

ជនរងគ្រោះទី១.ឈ្មោះ ស្លេះ ហាសាណាស់ ភេទស្រី អាយុ ៣៥ឆ្នាំ ជនជាតិចាម ទី២.ឈ្មោះ អាណាហ្វ៊ី​ អាហ្វ៊ីណាហ៊ីម ភេទប្រុស អាយុ ១២ឆ្នាំ ជនជាតិចាម ទី៣.ឈ្មោះ អាណាហ្វ៊ី សារីរ៉ា ភេទស្រី អាយុ ៥ឆ្នាំ ជនជាតិចាម និងទី៤.ឈ្មោះ ជុក ឧស្មាន​ ភេទស្រី អាយុ ៨ឆ្នាំ ជនជាតិចាម​ អ្នកទាំង៤ នាក់ ខាងលើមានទីលំនៅភូមិសាច់សូរ ឃុំពាមជីកង​ស្រុកកងមាស ខេត្តកំពង់ចាម ចំណែកសាកសពម្នាក់ទៀតមិនទាន់ឃើញឈ្មោះ អាណាហ្វ៊ី អាហ្វ៊ីណាហ៊ីម អាយុ១២ឆ្នាំ។

តាមសមត្ថកិច្ច បានឲ្យដឹងថា មូលហេតុនាំឲ្យមានករណីនេះ គឺដោយសារជនរងគ្រោះ បាននាំគ្នាទៅលេងទឹក នៅចុងកោះ។

ក្រោយពីពិនិត្យសាកសពរួច​ សមត្ថកិច្ចប៉ុស្តិ៍ពាមជីកង និងជំនាញបានសន្និដ្ឋានថា​សពទាំងអស់ពិតជាបានស្លាប់ ដោយសារលង់ទឹកប្រាកដមែន មិនពាក់ព័ន្ធនឹងរឿងព្រហ្មទណ្ឌនោះទេ ទើបក៏ប្រគល់សពជូនក្រុមគ្រួសារ យកទៅធ្វើបុណ្យតាមប្រពៃណី៕