ភ្នំពេញ: សេចក្តីរាយការណ៍ជាបឋមឲ្យដឹងថា ករណីថៅកែ ខុនដូ លោកឧត្តមសេនីយ៍ត្រី ប៉ិច តុងហេង វាយ កម្មកររើសអេតចាយ កាលពីវេលាម៉ោង១០ព្រឹក ថ្ងៃទី២៧ មេសា ២០១៨ បានចូលសារភាពនៅស្នងការដ្ឋាននគរបាលរាជធានីភ្នំពេញ ។
ក្រោយពីចូលសារភាព នៅវេលាម៉ោង៥ជាងល្ងាចថ្ងៃដដែល កម្លាំងសមត្ថកិច្ចនគរបាលព្រហ្មទណ្ឌកម្រិតស្រាល បានបញ្ជូនខ្លួនលោក ប៉ិច តុងហេង ទៅកាន់សាលាដំបូងរាជធានីភ្នំពេញ ។
នៅសាលាដំបូងរាជធានីភ្នំពេញ ត្រូវបានគេដឹងថា លោក បុិច តុងហេង គ្រាន់តែត្រូវបានមន្ត្រីរដ្ឋបាលសាលាដំបូងថតរូប ទុកជាឯកសារតែប៉ុណ្ណោះទេ សំណុំរឿងនេះមិនទាន់បានចាត់ទៅព្រះរាជអាជ្ញារងណាម្នាក់ណាឡើយ ដោយសារពេលវេលាផុតម៉ោងធ្វើការ ។
នគរបាលព្រហ្មទណ្ឌក៏បាននាំខ្លួនលោក បុិច តុងហេង ទៅវិញ និងតម្រូវឲ្យព្រឹកថ្ងៃទី២៨ មេសា មកម្តងទៀតដើម្បីសាកសួរជាផ្លូវការ ។
ទោះជាយ៉ាងណាក្តីនៅដំណាក់កាលនគរបាលព្រហ្មទណ្ឌលោក បុិច តុងហេង បានសងជំងឺចិត្តទៅជនរងគ្រោះ ជាអ្នករើសអេតចាយចំនួន ៤០០០ ដុល្លារអាមេរិករួចទៅហើយ នេះគ្រាន់តែជាសំណងរដ្ឋប្បវេណីទេ លោក បុិច តុងហេង នៅជាប់បណ្តឹងអាជ្ញាមួយទៀត ដូច្នោះហើយបានជានគរបាលនាំខ្លួនលោក ប៉ិច តុងហេងទៅតុលាការ ដើម្បីបំពេញតាមនីតិវិធី ។
លោក ប៉ិច តុងហេង ត្រូវបានតម្លើងឋានន្តរស័ក្តិជាឧត្តមសេនីយ៍ ព្រោះលោកមានស្នាដៃកសាងខុនដូជួលបានលុយច្រើន និង ចេះប្រើកាំភ្លើងវាយក្បាលអ្នកក្របែកក្បាលបានល្អ ។ មានអ្នកខ្លះនិយាយថា ទាហានតាំងពីឆ្នាំ ១៩៧៩ រកស័ក្តិពាក់មិនបាន រកតួនាទីគ្មានផង តែថៅកែខុនដូ ប៉ិច តុងហេង មិនដឹងជាធ្លាប់ឡើងប្រយុទ្ធនៅសមរភូមិណាខ្លះទេ បានមានស័ក្តិធំយ៉ាងនេះ៕
មតិយោបល់