Post News Media ព័ត៌មានជាតិ បើករថយន្តលឿនដ...

បើករថយន្តលឿនដូចហោះ ពន្លះក្បាលនាគពេញទំហឹង​ បាក់អស់២ផ្ទាំង រួចរត់គេចខ្លួនបាត់​!

ភ្នំពេញ: សង្ស័យស្រវឹងស្រា បើករថយន្ត ហាយប្រីត​ ពណ៌ខ្មៅ ស្លាកលេខ ភ្នំពេញ​ 2Q-2353 ទៅបុកក្បាលនាគពុះចែកផ្លូវ​ ពេញទំហឹង​ បណ្ដាលឲ្យបាក់និងខ្ទាតចេញពីជួរ ចំណែកឯរថយន្តរងការខូចខាតយ៉ាងដំណំ។

ហេតុការណ៍គ្រោះថ្នាក់ចរាចរណ៍នេះកើតឡើងនៅវេលាម៉ោង១និង២០នាទីរំលងអធ្រាត្រ​ ឈានចូលថ្ងៃទី២ ខែមិថុនា​ ឆ្នាំ​២០១៨នេះ​ ត្រង់ចំណុចស្តុបរោងកុនគីរីរម្យ ផ្លូវម៉ៅសេទុង​ ខណ្ឌ៧មករា រាជធានីភ្នំពេញ។

ប្រភពព័ត៌មានពីកន្លែងកើតហេតុបានប្រាប់ឲ្យដឹងថា​ នៅមុនពេលកើតហេតុ​ គេឃើញរថយន្ត ហាយប្រីត​ ពណ៌ខ្មៅ​ ស្លាកលេខ ភ្នំពេញ​ 2Q-2353 បើកបរដោយបុរសម្នាក់​ សង្ស័យស្រវឹងស្រា រួមដំណើរជាមួយនារីម្នាក់ទៀត បានធ្វើដំណើរពីកើតទៅលិច ក្នុងល្បឿនលឿនដូចហោះ លុះមកដល់ចំណុចកើតហេតុ​ ស្រាប់តែជ្រុលទៅបុក​របាំងថ្មបែងចែកទ្រូងផ្លូវពេញទំហឹង បណ្ដាលបាក់និងខ្ទាតចេញពីជួរ អស់២ផ្ទាំង​ ។ចំណែករថយន្តបង្កខូចខាតយ៉ាងដំណំ ហើយមុនសមត្ថកិច្ចចុះទៅដល់ ម្ចាស់រថយន្តនិងនារីម្នាក់ទៀតរួមដំណើរជាមួយគ្នា បានបើកទ្វារចេញមក រួចហៅរ៉ឺម៉កកង់បី ជិះគេចខ្លួនពីកន្លែងកើតហេតុបាត់ទៅហើយ។

ក្រោយពេលកើតហេតុ​សមត្ថកិច្ចមូលដ្ឋានចុះមកដល់កន្លែងកើតហេតុរួច​ ទាក់ទងសមត្ថកិច្ចជំនាញផ្នែកចរាចរណ៍​ ចុះមកធ្វើការវាស់វែង​ រួចស្ទូចរថយន្តបង្កហេតុនោះទៅ​ រក្សាទុកនៅ​ការិយាល័យចរាចរណ៍ជើងគោក​ នៃស្នងការដ្ឋាននគរបាលរាជធានីភ្នំពេញ​ រង់ចាំម្ចាស់រថយន្តចូលខ្លួនដោះស្រាយគ្នានៅពេលក្រោយ​ ៕

Loading...