Post News Media ព័ត៌មានជាតិ បែកពីសង្សារ ឃ...

បែកពីសង្សារ ឃើញគេមានថ្មី កើតចិត្តខឹង​ប្រើហិង្សាទៅលើខាងស្រី!..

បន្ទាយមានជ័យ: កាលពីថ្ងៃទី៣១ ខែឧសភា ឆ្នាំ២០១៨ វេលាម៉ោង ៣និង៣០នាទី កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្រ្កាបករណី ហិង្សាដោយចេតនា និងឃាត់ខ្លួនជនសង្ស័យម្នាក់ នៅចំណុចភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត។

លោកវរសេនីយ៍ត្រី នួន នីណារ៉ូ បានឲ្យដឹងថា យោងលើពាក្យបណ្តឹងរបស់ឈ្មោះ សារិន វាសនា ភេទ ស្រី អាយុ២៤ឆ្នាំ រស់នៅភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត និងដោយទទួលបានការអនុញ្ញាតពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត កម្លាំងកងរាជអាវុធហត្ថ បានចុះប្រតិបត្តិការបង្រ្កាបករណីខាងលើ និងឃាត់ខ្លួនជនសង្ស័យឈ្មោះ មាស វណ្ណនុត(ហៅ និត) ភេទ ប្រុស អាយុ ២១ឆ្នាំ ជនជាតិខ្មែរ ស្នាក់នៅបន្ទប់ជួល ក្នុងផ្ទះសំណាក់ លឹម ងួន ស្ថិតនៅភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ។ និងវត្ថុតាងប្រព្រឹត្តបទល្មើសរួមមាន ៖ -ដង្កៀបអ៊ុតសក់ចំនួន ០១ និងកាំបិតចិតបន្លែចំនួន ០១។ បន្ទាប់ពីធ្វើការឃាត់ខ្លួន និងសាកសួរចម្លើយរួចមក លោកបានកសាងសំណុំរឿងបញ្ជូនជនសង្ស័យ ទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ។

លោកវរសេនីយ៍ឯក ម៉ែន ភិរម្យ បានបញ្ជាក់ថា ៖ តាមការបំភ្លឺរបស់ជនរងគ្រោះ បានបញ្ជាក់ថា ៖ ខ្លួន និងជនសង្ស័យ ពីមុនមកធ្លាប់មានទំនាក់ទំនងស្នេហាជាមួយគ្នា ហើយបានបែកបាក់គ្នា រយ:ពេល ០១ខែមកហើយ ចាប់តាំងពីបែកបាក់គ្នាមក ខ្លួនក៏មានសង្សារថ្មីផងដែរ ។ លុះដល់ថ្ងៃទី៣១ ខែឧសភា ឆ្នាំ២០១៨ វេលាម៉ោង ០៣ និង ០០នាទី ខ្លួន និងសង្សារកំពុងអង្គុយលេងក្នុងបន្ទប់ ស្រាប់តែជនសង្ស័យ មកធាក់ទ្វារចូលក្នុងបន្ទប់របស់ខ្លួន ហើយស្រែកជេរ និងគម្រាមមកលើខ្លួន ហើយក៏ចាកចេញទៅវិញ ។ នៅវេលាម៉ោង ០៣ និង ៣០នាទី ជនសង្ស័យក៏បានត្រឡប់មកវិញ ចូលដល់ក្នុងបន្ទប់ក៏ស្ទុះមកវាយខ្លួន(ជនរងគ្រោះ)ចំនួន ០៣ដៃ រួចក៏ចេញទៅវិញបាត់ មួយសន្ទុះក្រោយមកជនសង្ស័យ បានត្រឡប់មកវិញម្តងទៀត បានយកដង្កៀបអ៊ុតសក់វាយមកលើខ្លួន ត្រូវជាច្រើនកន្លែង ហើយបានយកកូនកាំបិត និងកន្ត្រៃ គម្រាមចាក់សម្លាប់ខ្លួន(ជនរងគ្រោះ) ទៀតផង ។

លោកវរសេនីយ៍ឯក ម៉ែន ភិរម្យ បានបន្ថែមថា ៖ បន្ទាប់ពីធ្វើការឃាត់ខ្លួន និងសាកសួរចម្លើយ ជនសង្ស័យបានសារភាពថា ៖ ខ្លួន និងជនរងគ្រោះ បានបែកបាក់គ្នា រយ:ពេល ០១ខែមកហើយ តែដោយសារតែនឹក និងស្រឡាញ់ ក៏ទៅរកជនរងគ្រោះវិញ ពេលទៅដល់បន្ទប់ជនរងគ្រោះ ស្រាប់តែឃើញជនរងគ្រោះមានសង្សារថ្មី ក៏កើតចិត្តខឹង ហើយខ្លួនបានចេញទៅក្រៅ ផឹកស្រាបៀរអស់ ០១កំប៉ុង ហើយបានត្រឡប់ទៅបន្ទប់របស់ជនរងគ្រោះ ដោយសារតែការប្រច័ណ្ឌ ខ្លួនបានវាយទៅលើជនរងគ្រោះជាច្រើនដៃ និងបានយកដង្កៀបអ៊ុតសក់ វាយបន្ថែមទៅលើជនរងគ្រោះ ហើយព្រមទាំងគម្រាមសម្លាប់បើជនរងគ្រោះមិនព្រមត្រូវជាមួយខ្លួនវិញ ។ ផ្អែកលើចម្លើយសារភាពរបស់ជនសង្ស័យ និងតាមការបំភ្លឺរបស់ជនរងគ្រោះ ឃើញមានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ បានប្រព្រឹត្តបទល្មើស ៖ ហឹង្សារដោយចេតនា យ៉ាងពិតប្រាកដ ។

កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការ ដើម្បីចាត់ការទៅតាមនីតិវិធី៕

Loading...