Post News Media ព័ត៌មានជាតិ រថយន្តហាយឡែនឌ...

រថយន្តហាយឡែនឌ័របើកបត់មិនប្រយ័ត្ន ត្រូវម៉ូតូអាយខុន បុកទាំងកំរោល ស្លាប់ម្នាក់ របួសធ្ងន់ស្រាល២នាក់!

ភ្នំពេញ: យុវជនម្នាក់បានស្លាប់ភ្លាមៗនៅកន្លែងកើតហេតុ និង២នាក់ទៀតរងរបួសធ្ងន់ស្រាល ត្រូវបានបញ្ជូនទៅសង្គ្រោះនៅមន្ទីរពេទ្យ ខណ:ពួកគេជិះម៉ូតូលឿនជ្រុលបុកជាមួយរថយន្តហាយឡែនឌ័រ ដែលបត់មិនប្រយ័ត្ន។

ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី៤ ខែមិថុនា ឆ្នាំ២០១៨ នៅចំណុចគល់ស្ពានអាកាស៧មករាខាងកើត តាមបណ្តោយផ្លូវមហាវិថីសហព័ន្ធរុស្ស៊ី ស្ថិតក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ។

ជនរងគ្រោះឈ្មោះឈួនវិសាល ភេទប្រុស អាយុ១៨ ឆ្នាំមុខរបរកាត់ដេរ ស្នាក់នៅសង្កាត់ទឹកថ្លា ខណ្ឌសែនសុខ មានស្រុកកំណើតភូមិធំ ឃុំកំពែង ស្រុកគិរីវង់ ខេត្តតាកែវ។

តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញម៉ូតូមួយគ្រឿងម៉ាកអាយខុន ពណ៌ទឹកក្រូចលាយស ពាក់ស្លាកលេខ ភ្នំពេញ 1AW-8036 ជិះគ្នា៣នាក់ធ្វើដំណើរតាមបណ្តោយផ្លូវមហាវិថីសហព័ន្ធរុស្ស៊ី ក្នុងទិសដៅពីកើតទៅលិច ខណ:មកដល់ចំណុចកើតហេតុ ស្រាប់តែមានរថយន្តម៉ាកហាយឡែនឌ័រ ពណ៌ទឹកប្រាក់មិនចាំស្លាកលេខ ធ្វើដំណើរចុះពីស្ពានអាកាស៧មករាក្នុងទិសដៅពីលិចទៅកើតហើយបានបត់ត្រឡប់ឆ្វេងដៃបម្រុងបត់ត្រឡប់ក្រោយវិញដោយមិនបានប្រុងប្រយ័ត្នក៏ត្រូវម៉ូតូបុកពេញទំហឹងបណ្តាលឲ្យស្លាប់ភ្លាមម្នាក់ និង២នាក់ទៀតរងរបួសធ្ងន់ស្រាល។ ភ្លាមៗនោះរថយន្តបានបើកគេចខ្លួនបាត់ស្រមោល។ ចំណែកអ្នករងរបួសត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ។

ក្រោយពេលកើតហេតុសមត្ថកិច្ចបានចុះមកដល់ចំណុចកើតហេតុនិងប្រគល់សពទៅក្រុមគ្រួសារដើម្បីយកទៅធ្វើបុណ្យនៅស្រុកកំណើតតាមប្រពៃណី។ ដោយឡែកម៉ូតូត្រូវបានសមត្ថកិច្ចយកទៅរក្សាទុករងចាំបងប្អូនយកឯកសារមកទទួលយកវិញ៕

Loading...