Post News Media ព័ត៌មានជាតិ សន្តិសុខ​ហាងម...

សន្តិសុខ​ហាងម្ហូបស្រស់លើភ្នំ ​លួច​ម៉ូតូ​ភ្ញៀវ​ដែល​ផ្ញើរ​ហើយ​ភ្លេចដកសោរ ត្រូវ​បាន​ឆែក​ឃើញ​សកម្ម​ភាព​តាម​កាមេរ៉ា​សុវត្ថិ​ភាព​!

ភ្នំ​ពេញ: បុរស​ម្នាក់​ជាសន្តិសុខ​យាម​ម៉ូតូ​នៅ​ហាងម្ហូបស្រស់លើភ្នំ​ បាន​លួច​ម៉ូតូ​របស់​ភ្ញៀវ​ ដែល​ផ្ញើរ​ហើយ​ភ្លេចដកសោរ ​យកជិះ​ចេញ​ទៅ​បាត់​ ហើយ​ត្រូវ​បាន​គេ​ឆែក​មើល​ឃើញ​ពី​សកម្ម​ភាព​លួច​​ម៉ូតូ​តាម​រយ:ខ្សែអាត់​វីដេ​អូ ក្នុង​កាមេរ៉ា​សុវត្តិ​ភាព​ ដែលបំពាក់នៅក្នុង​មុខហាង ​បន្ទាប់​ពី​ភ្ញៀវ​បាន​ឆោឡោ​ពី​ការ​បាត់ម៉ូតូ​ ។​ ហេតុការណ៍នេះ​បាន​បង្កឲ្យមាន​ការ​ភ្ញាក់​ផ្អើល​នៅ​វេលា​ម៉ោង១១និង៣០នាទីយប់ ថ្ងៃ​ទី៦ ខែមិថុនា​ ឆ្នាំ​២០១៨នេះ ​នៅ​កន្លែង​ផ្ញើរ​ម៉ូតូ​មុខហាងផឹកស៊ីយីហោ «ហាងម្ហូបស្រស់លើភ្នំ» ដែលស្ថិតនៅតាមបណ្ដោយផ្លូវ២០០៤ សង្កាត់អូរបែកក្អម ខណ្ឌសែនសុខ​ រាជធានីភ្នំពេញ​ (ជិតស្តុប NOKIA)។

ម្ចាស់ម៉ូតូដែលសន្តិសុខលួចយកទៅនោះឈ្មោះ ងួន រដ្ឋា អាយុ២១ឆ្នាំ មុខរបរធ្វើការក្រុមហ៊ុនឯកជន ស្នាក់នៅម្ដុំអូរបាយក្អម ខណ្ឌសែនសុខ​ រាជធានីភ្នំពេញ​។ ចំណែកជនសង្ស័យដែលសន្តិសុខនោះឈ្មោះ អូន នាង អាយុប្រហែល២៧ឆ្នាំ ស្នាក់នៅហាងកើតហេតុខាងលើ។

ប្រ​ភព​ព័ត៌មាន​ពីម្ចាស់ហាងបានរៀបរាប់ប្រាប់ឲ្យដឹងថា នៅ​មុន​ពេល​កើត​ហេតុ​បុរស​រង​គ្រោះ​​បាន​​​​ចូលមកជួបជុំមិត្តភក្តិផឹកស៊ីក្នុងហាង «ហាងម្ហូបស្រស់លើភ្នំ» ដោយបានយក​ម៉ូតូ​របស់ខ្លួន ដែលទើបនឹងទិញ ម៉ាកឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ​ មួយ​គ្រឿង ពា​ក់ស្លាក​លេ​ខ​ភ្នំ​ពេញ 1GW-2968 ទៅ​ផ្ញើរ​នៅ​កន្លែងផ្ញើរម៉ូតូមុខហាងខាងលើនោះ បន្ទាប់មក​បុរសរង​គ្រោះ​ក៏បាន​ចូលទៅអង្គុយជួបជុំមិត្តភក្តិក្នុងហាង រហូតដល់ម៉ោងជិត១១យប់ ទើបនាំគ្នាគិតលុយចេញមកវិញ ហើយគាត់ក៏បានដើរមក​យក​ម៉ូតូ ដែលផ្ញើរនោះ ​ទើប​ដឹង​ថា​បាត់​ម៉ូតូ​បង្ក​ឲ្យ​មាន​ការ​ភ្ញាក់​ផ្អើល​តែម្តង ។

បន្ទាប់ពី​មាន​ការ​ភ្ញាក់​ផ្អើល​ថា​មាន​ភ្ញៀវ​បាត់ម៉ូតូ​ពេល​នោះ​ បុរសដែលជាម្ចាស់ហាងកើតហេតុ ​បាន​បើក​មើល​ក្នុងកាមេរ៉ា​សុវត្ថិ​ភាព​ ដែល​បំពាក់នៅ​ខាងមុខហាង ពេល​នោះ​ក៏បាន​ឃើញ​ពី​សកម្ម​ភាព​របស់​សន្តិ​សុខ​ដែលទើបចូលធ្វើការបានជិត៣ខែ ដែលយាម​ម៉ូតូ​នោះ បាន​ធ្វើសកម្ម​ភាព​លួច​យក​ម៉ូតូ​ម៉ាក​ឌ្រីមរបស់​បុរស​រង​គ្រោះ ។ ដោយ​ពី​ដំបូង​ឡើយម៉ូតូ​ឌ្រីម របស់​បុរសរង​គ្រោះ​ដែល​យក​ទៅ​ផ្ញើរ​នោះ​បានភ្លេច​កូន​សោជាប់នឹង​ម៉ូតូ​ ឃើញ​ដូច​នោះ​សន្តិ​សុខ​ដែល​ជា​ជន​សង្ស័យ​ បាន​ដើរ​ទៅ​ដក​សោ​ទុក ហើយ​ពេលមានឱកាសល្អ ​ក៏យក​សោ​ចាក់.ក​ម៉ូតូ​ជិះ​ចេញ​ទៅបាត់ដោយ​សុវត្ថិ​ភាព​។

ក្រោយ​ពេល​កើត​ហេតុ​ម្ចាស់ហាងទាំងប្រុសស្រីបាននាំបុរសរង​គ្រោះ​បាន​ទៅ​ដាក់ពាក្យបណ្តឹង​នៅ​ប៉ុស្តិ៍​នគរ​បាល​រដ្ឋ​បាលផ្សារដីហ៊ុយ ហើយ​ក៏បាន​ធ្វើ​ដំណើរ​ត្រ​ឡប់ទៅ​ផ្ទះ​វិញ ៕