Post News Media ព័ត៌មានជាតិ ព្រះរាជអាជ្ញា...

ព្រះរាជអាជ្ញារង ឡុង ជាប ដោះលែងជនជាតិចិន១៤នាក់ ខណ:ដែលពលរដ្ឋទើបប្តឹងទៅACU

ភ្នំពេញ: បើយោងតាម សមត្ថកិច្ចព្រហ្មទណ្ឌខណ្ឌពោធិ៍សែនជ័យ បានឲ្យដឹងថា ក្រុមជនជាតិចិនប្រុសស្រីដែលវក់នឹងល្បែងស៊ីសង ខុសច្បាប់ អាចជាក្រុម ជនល្មើស ចាប់ជម្រិតអនឡាញ ឬបង្ខាំងមនុស្សគំរាម ទារប្រាក់ នៅពេលចាញ់ល្បែង ចំនួន ១៤នាក់ ដែលសមត្ថកិច្ចឃាត់ខ្លួន បញ្ជូនទៅតុលាការ ត្រូវបានលោក ឡុង ជាប ព្រះរាជអាជ្ញារងអមសាលាដំបូងរាជធានីភ្នំពេញ ដោះលែងឲ្យមានសេរីភាពវិញ អស់ហើយ នៅរសៀលថ្ងៃទី០៦ ខែមិថុនា ឆ្នាំ២០១៨នេះ។

បើតាមសមត្ថកិច្ចជនសង្ស័យ ជាជាតិចិន ដែលត្រូវបានលោកព្រះរាជអាជ្ញារង ឡុង ជាប ដោះលែងនារសៀលនេះ រួមមានប្រុស ១០នាក់ និងស្រី ៤នាក់។

ក្រុមជនសង្ស័យត្រូវបាន កម្លាំងសមត្ថកិច្ចខណ្ឌពោធិ៍សែនជ័យ ឃាត់ខ្លួន កាលពីយប់ថ្ងៃទី២ មិថុនា ២០១៨ នៅក្នុងបុរីមួយកន្លែង ភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ ខណ:ពួកគេ កំពុងកំពុងប្រមូលផ្តុំគ្នាលេងល្បែងស៊ីសង ប្រភេទ បៀចិនម៉ាជាំង។

សមត្ថកិច្ចមូលដ្ឋាន បានឲ្យដឹងថា ការចុះបង្ក្រាបក្រុមជនជាតិចិន លេងល្បែងស៊ីសងខុសច្បាប់នេះ បន្ទាប់ពីមានសេចក្តីរាយការណ៍ពីប្រជាពលរដ្ឋ ដែលរស់នៅក្បែរនោះ។

គួរជម្រាបជូនថា សមត្ថកិច្ចកម្ពុជា ការពីពេលកន្លងទៅ បានចាប់បញ្ជូនខ្លួនជនជាតិចិន រាប់ពាន់នាក់ ឲ្យទៅប្រទេសកំណើតវិញ ដោយសារតែពួកគេ បានប្រព្រឹត្តបទល្មើស ចាប់ជម្រិត និងចាប់បង្ខាំង ជនជាតិចិនដូចគ្នា នៅតាមផ្ទះជួល។

ការប្រព្រឹត្តបទល្មើស នានា នៅក្នុងប្រទេសកម្ពុជា ពីសំណាក់ជនជាតិចិន ត្រូវបានសមត្ថកិច្ចរកឃើញថា ភាគច្រើន បានកើតឡើង ដោយសារតែពួកគេ បានចាញ់ល្បែងស៊ីសងនេះឯង។

ពាក់ព័ន្ធនឹងបញ្ហា ជនជាតិចិន ដែលប្រព្រឹត្តបទល្មើសនៅក្នុងប្រទេសកម្ពុជា មន្ត្រីជាន់ខ្ពស់របស់ នៃស្ថានទូត សាធារណរដ្ឋប្រជាមានិតចិន ប្រចាំកម្ពុជា ក៏ធ្លាប់បានលើកឡើងផងដែរថា ប្រទេសកម្ពុជា និងអាជ្ញាធរមានសមត្ថកិច្ចកម្ពុជា ត្រូវតែអនុវត្តច្បាប់ ឲ្យបានម៉ឺងម៉ាត់ ចំពោះជនជាតិចិនរូបណាដែលហ៊ានប្រព្រឹត្តបទល្មើសផ្ទុយពីច្បាប់កម្ពុជា ប៉ុន្តែនៅពេលនេះ លោកព្រះរាជអាជ្ញារង ឡុង ជាប ហាក់មិនសហការអនុវត្ត គោលនយោបាយភូមិឃុំមានសុវត្ថិភាពរបស់រាជរដ្ឋាភិបាលកម្ពុជា ដែលមានសម្តេចតេជោ ជាប្រមុខដឹកនាំ និងហាក់មើលស្រាលចំពោះ ការប្តេជ្ញាចិត្តសហការ ក្នុងអនុវត្តច្បាប់ កម្ពុជា របស់មហាមិត្តចិនផងដែរ។

គួររំលឹកថា នៅពេលថ្មីៗនេះ លោកព្រះរាជអាជ្ញារង ឡុង ជាប ក៏មានឈ្មោះនៅក្នុងពាក្យបណ្តឹងរបស់ពលរដ្ឋ ដែលដាក់ទៅកាន់ ទំព័រហ្វេសប៊ុកសម្តេចតេជោនាយករដ្ឋមន្ត្រី និងអង្គភាពប្រឆាំងអំពើពុករលួយ ពាក់ព័ន្ធ អំពើស៊ីសំណូក ជាទឹកប្រាក់ចំនួន ៥០០០ដុល្លារ ជាថ្នូរនឹងការតម្កល់រឿងទុកឥតចាត់ការ៕