ភ្នំពេញៈ ជនសង្ស័យម្នាក់ត្រូវបានកម្លាំងសមត្ថកិច្ចប៉ុស្តិ៍ទួលសង្កែ សហការជាមួយកម្លាំងសមត្ថកិច្ចខណ្ឌបានធ្វើការឃាត់ខ្លួន កាលពីវេលាម៉ោង២និង១០នាទីរំលងអាធ្រាត្រ ឈានចូលថ្ងៃទី២៣ ខែមិថុនា ឆ្នាំ២០១៦ ដែលស្ថិតនៅចំណុចផ្លូវលេខ៩៣កែផ្លូវលេខ៦២ ក្រុមទី១៨ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ។
ជនសង្ស័យមានឈ្មោះ លឹម យ៉ាងនៀរ ភេទប្រុស អាយុ ៣៥ឆ្នាំ ជនជាតិ វៀតណាម មុខរបរ មិនពិតប្រាកដ ស្នាក់នៅបន្ទប់ជួលលេខ១២ ផ្លូវរថភ្លើង ក្រុមទី៨ ភូមិបឹងសាឡា សង្កាត់ឫស្សីកែវ ខណ្ឌឫស្សីកែវ។
លោក ណាយ ច័ន្ទណារ័ត្ន មន្ត្រីព្រហ្មទណ្ឌខណ្ឌឫស្សីកែវ បានប្រាប់ឲ្យដឹងថា នៅមុនពេលកើតហេតុ កម្លាំងសម្ថកិច្ចប៉ុស្តិ៍ទួលសង្កែសហការជាមួយកម្លាំងសមត្ថកិច្ចខណ្ឌ បានធ្វើការជិះល្បាតក្នុងមូលដ្ឋាន ដើម្បីការពារសន្តិសុខសុវត្ថិភាពជូនប្រជាពលរដ្ឋក្នុងមូលដ្ឋាន ក៏ដូចជាទប់ស្កាត់នៅបទល្មើស ឆក់ ប្លន់ លួច គាស់ផ្ទះ និងគ្រឿងញៀន ។ ពេលនោះ ស្រាប់តែបានប្រទះឃើញជនសង្ស័យម្នាក់ជិះម៉ូតូ មួយគ្រឿង ម៉ាក HONDA Sopcopy Miniy ពណ៌ទឹកប្រាក់ ពាក់ស្លាកលេខ ភ្នំពេញ 1G-3501 ដោយមានការសង្ស័យ ទើបកម្លាំងសមត្ថកិច្ចបានធ្វើការឃាត់ និងឆែកឆេររកឃើញនៅថ្នាំញៀនប្រភេទ យ៉ាម៉ា ៥០គ្រាប់ សមត្ថកិច្ចយើងបានយកមកប៉ុស្តិ៍ទួលសង្កែ ដើម្បីធ្វើការសាកសួរ។
បច្ចុប្បន្ន ជនសង្ស័យខាងលើ ត្រូវបានកម្លាំងសមត្ថកិច្ចឃុំខ្លួនជាបណ្តោអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅកាន់តុលាការ ចាត់ការតាមនីតិវិធី៕
មតិយោបល់