ភ្នំពេញៈ គ្រោះថ្នាក់ចរាចរណ៍​មួយកើតឡើងរវាងរថយន្តក្រឡុកស៊ីម៉ង់ត៍ ប៉ះជាមួយម៉ូតូ រហូតដោះស្រាយគ្នាមិនចេញ រហូតកើតមានជម្លោះតឹងសរសៃកដាក់គ្នា រវាងភាគីទាំងសងខាង បង្កការភ្ញាក់ផ្អើលទាំងកណ្ដាលយប់។

ហេតុការណ៍គ្រោះថ្នាក់ចរាចរណ៍ខាងលើនេះកើតឡើងនៅ​វេលាម៉ោង១២និង៣០នាទីរំលងអធ្រាត្រ​ ឈានចូលថ្ងៃអង្គារ៍ ទី១២ ខែមិថុនា​ ឆ្នាំ២០១៨នេះ ត្រង់ចំណុចមុខខុនដូរ​ព្រីនផ្លាហ្សា​ តាមបណ្ដោយផ្លូវព្រះនរោត្តម ស្ថិតក្នុងសង្កាត់ទន្លេបាសាក់​ ខណ្ឌចំការមន​ រាជធានីភ្នំពេញ​។

សាក្សីដែលឃើញហេតុការណ៍ផ្ទាល់បានប្រាប់ Post Newsថា​ នៅពេលកើតហេតុ​ គេឃើញបុរសម្នាក់ជិះម៉ូតូមួយគ្រឿងម៉ាក ពាក់ស្លាកលេខ ត្បូងឃ្មុំ​ 1E-2560 បើកបរក្នុងល្បឿនធម្មតា ទិសដៅពីជើងទៅត្បូង​ តាមបណ្តោយផ្លូវព្រះនរោត្តម លុះមកដល់ចំណុចកើតហេតុ ម៉ូតូបានចាប់ហ្វ្រាំងបន្ថយលឿនព្រោះមានរថយន្តប្រមូលសំរាមមួយគ្រឿងទៀតនៅពីមុខ ស្រាប់តែមានរថយន្តក្រឡុកស៊ីម៉ង់ត៍មួយគ្រឿង ពាក់ស្លាកលេខ ភ្នំពេញ​ 5A-0934 បើកមកពីក្រោយបុកប៉ះម៉ូតូនោះ​ បណ្ដាលឲ្យបុរសម្ចាស់ម៉ូតូរបួសអូសជិត១០ម៉ែត្រ ភ្លាមៗនោះរថយន្តបង្កក៏ត្រូវបានអ្នកឃើញហេតុការណ៍ផ្ទាល់ឃាត់បានភ្លាមៗនៅកន្លែងកើតហេតុដែរ ។

សាក្សីខាងលើបានបន្ថែមទៀតថា ក្រោយមកក៏មានបុរសម្នាក់មានទាំងវិទ្យុទាក់ជាប់ខ្លួនដែលជាតំណាងរថយន្តកុងតឺន័រ មកដោះស្រាយ ដោយចេញសំណង៥០ដុល្លារ​ ដើម្បីបញ្ចប់រឿង​ តែភាគីខាងម៉ូតូមិនព្រម ទាមទារ១០០ដុល្លារ​ ដើម្បីជួសជុលម៉ូតូ និងលាងរបួស ស្រាប់តែបុរសដែលជាតំណាងនោះប្រើសម្តីមិនសមរម្យ​និងសំឡុត ប្រជាពលរដ្ឋនិងសមត្ថកិច្ចទៀតផង តែពេលក្រុមអ្នកសារព័ត៌មានយើងទៅសាកសួរគាត់ តែប្រកែកថាគាត់មិនបាននិយាយទេ ទើបប្រជាពលរដ្ឋនាំគ្នាស្រែកដាក់បុរសដែលជាតំណាងនោះ​ រហូតកើតមានជម្លោះពាក្យសម្តីគ្នា បង្កការភ្ញាក់ផ្អើលយ៉ាងខ្លាំង​។

ក្រោយពេលកើតហេតុសមត្ថកិច្ចមូលដ្ឋានបានចុះសម្របសម្រួលដើម្បីកុំអោយមានជម្លោះបន្តទៀត​ ។ ចំណែកជនរងគ្រោះក៏បានឡើងរថយន្តគិលានសង្គ្រោះគ្លីនិកឯកជនហុងហាក់ ដើម្បីទៅលាងរបួស។

បច្ចុប្បន្នរថយន្តបង្កហេតុនិងម៉ូតូរងគ្រោះត្រូវបានសមត្ថកិច្ចមូលដ្ឋានទាក់ទងទៅ​ សមត្ថកិច្ចជំនាញ​ចុះមកធ្វើការវាស់វែង​ រួចទៅរក្សាទុកនៅ​ការិយាល័យចរាចរណ៍ជើងគោក​ នៃស្នងការដ្ឋាននគរបាលរាជធានីភ្នំពេញ​ រង់ចាំភាគីទាំងសងខាងធ្វើការដោះស្រាយគ្នានៅពេលក្រោយ​៕