ភ្នំពេញៈ បុរសម្នាក់ស្រវឹងធ្លាក់ភ្នែកបើកម៉ូតូមួយគ្រឿងបោះពួយយ៉ាងលឿនរួចក៏រេចង្កូតទៅបុកបង្គោលភ្លើងដែលនៅលើខឿនតាមចិញ្ចើមផ្លូវបណ្ដាលឲ្យរងរបួសធ្ងន់ធ្ងរ ត្រូវបានរថយន្ដសង្គ្រោះបន្ទាន់ដឹកទៅសង្គ្រោះភ្លាមៗ។ ហេតុការណ៍នេះកើតឡើងកាលពីវេលាម៉ោង១០និង១០នាទីយប់ ថ្ងៃទី១៣ ខែមិថុនា ឆ្នាំ២០១៨ត្រង់ចំណុចខាងលិចផ្សារដើមគរប្រមាណ២០០ម៉ែត្រ តាមបណ្ដោយផ្លូវ៣៣៦ ស្ថិតក្នុងសង្កាត់បឹងសាឡាង ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ស្រវឹងជោកជាំ បើកបរម៉ូតូមួយគ្រឿងម៉ាក ហុងដាឌ្រីម ស៊េរី០១៨ ពណ៌ខ្មៅ អត់មានស្លាកលេខ ដោយធ្វើដំណើរតាមបណ្ដោយផ្លូវ៣៣៦ ទិសដៅពីលិចទៅកើត ក្នុងល្បឿនយ៉ាងលឿន។ លុះមកដល់ចំណុចកើតហេតុស្រាប់តែម៉ូតូខាងលើក៏រេចង្កូតទៅខាងស្ដាំទៅឡើងខឿនជ្រុលទៅបុកបង្គោលភ្លើងបណ្ដាលឲ្យអ្នកបើកបរម៉ូតូរងរបួសបែកក្បាលសន្លប់ស្ដូកស្ដឹង ត្រូវបានរថយន្ដសង្គ្រោះបន្ទាន់ដឹកយកទៅសង្គ្រោះនៅគ្លីនិកឯកជនហុងហាក់។
ដោយឡែកម៉ូតូរងការខូចខាតបែកកាបាំងខាងស្តាំត្រូវបានសមត្ថកិច្ចមូលដ្ឋានយកទៅរក្សាទុកនៅអធិការដ្ឋាននគរបាលខណ្ឌទួលគោកដើម្បីរង់ចាំសាច់ញាតិយកឯកសារពាក់ព័ន្ធមកម៉ូតូត្រឡប់ទៅវិញនៅពេលក្រោយ៕
មតិយោបល់