Post News Media ព័ត៌មានជាតិ ឆបោកម៉ូតូយកទៅ...

ឆបោកម៉ូតូយកទៅលក់បាត់ គេចខ្លួន២៧ថ្ងៃ ម្ចាស់ឃើញមុខចាប់ខ្លួនប្រគល់ឲ្យប៉ូលិស

ភ្នំពេញ: ជនសង្ស័យម្នាក់ក្រោយពីឆបោកម៉ូតូZoomer មួយគ្រឿង និងទូរស័ព្ទដៃអាហ្វូនមួយគ្រឿងពីអ្នកស្គាល់ស្នាក់នៅបន្ទប់ក្បែរខាងគ្នាបានសម្រេចហើយ យកទៅលក់បាត់ រួចគេចខ្លួន ជនរងគ្រោះដឹងថាបាញ់ល្បិចហើយ ក៏បានទៅដាក់ពាក្យបណ្តឹងហើយដែរនៅប៉ុស្តិ៍ប៉ូលិស ស្រាប់តែ២៧ថ្ងៃក្រោយ បែជាជនរងគ្រោះប្រទះឃើញជនសង្ស័យកំពុងធ្វើការងារ ប្រមូលគ្នីគ្នាចាប់ខ្លួនប្រគល់ឲ្យប៉ូលិស កាលពីវេលាម៉ោង៥ ល្ងាចថ្ងៃទី៣ ខែកក្កដា ឆ្នាំ២០១៨ ស្ថិតនៅការដ្ឋានសំណង់មួយកន្លែង ក្នុងភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ ។

ជនសង្ស័យឈ្មោះ លាប ឡាត់ ហៅយ៉ែម ភេទប្រុស អាយុ៣១ឆ្នាំ មុខរបរ កម្មករសំណង់ ស្នាក់នៅភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើត ភូមិបឹងអក្សរ ឃុំឫស្សីស្រុក ស្រុកពាមជរ ខេត្តព្រៃវែង ។

ម៉ូតូដែលជនសង្ស័យឆបោកយកទៅម៉ាក ZOOMER ពណ៌ទឹកប្រាក់ ពាក់ស្លាកលេខ ភ្នំពេញ 1FL-8446 មានម្ចាស់ជាជនរងគ្រោះ ឈ្មោះ បូ ប៊ុនឡេង ភេទប្រុស អាយុ២៦ឆ្នាំ មុខរបរ ជាងភ្លើង ស្នាក់នៅផ្ទះជួល ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើត ភូមិសំបូរ ឃុំសំបូរ ស្រុកប្រាសាទសំបូរ ខេត្តកំពង់ធំ ។

តាមសម្តីជនរងគ្រោះ បានឲ្យដឹងថា នៅវេលាម៉ោង១០ព្រឹក ថ្ងៃទី០៨ ខែមិថុនា ឆ្នាំ២០១៨ កន្លងទៅ ចំថ្ងៃអាទិត្យ សម្រាកពីការងារ នាំគ្នានៅបន្ទប់ជួល ហើយ ជនសង្ស័យឈ្មោះ លាប ឡាត់ បានខ្ចីទូរស័ព្ទ ម៉ាកអាហ្វូន ៦ ឈ្មោះ គង់ មូល ភេទប្រុស អាយុ២៣ឆ្នាំ មុខរបរជាងភ្លើង ត្រូវជាប្អូនប្រុសជីដូនមួយ របស់ជនរងគ្រោះដែលស្នាក់នៅជាមួយគ្នា២នាក់បងប្អូន និយាយ មិនទាន់ទាំងឲ្យវិញផង ជនសង្ស័យបន្តទៅខ្ចីម៉ូតូ របស់ជនរងគ្រោះ ឈ្មោះ បូ ប៊ុនឡេង ដោយប្រាប់ថាជិះទៅយកលុយមួយភ្លែត ដោយយល់ និងទុកចិត្តអាងបន្ទប់ក្បែរខាងគ្នា ទើបអនុញាតិឲ្យខ្ចីជិះ ជនសង្ស័យបានទាំងម៉ូតូ ទាំងទូរស័ព្ទហើយ ជិះចេញទៅបាត់ មិនឃើញវិលវិញ ទ្រាំលែងបាន ជនរងគ្រោះរត់ទៅប្តឹងនគរបាលប៉ុស្តិ៍ចោមចៅ៣ ឲ្យជួយស្រាវជ្រាវ ។

ជនរងគ្រោះបន្តទៀតថា ក្រោយពីជនសង្ស័យឆបោកយកម៉ូតូនិងទូរស័ព្ទ ទៅបាត់ ប្តឹងប៉ូលិសក៏រួចហើយដែរ ស្រាប់តែ២៧ថ្ងៃក្រោយ នៅវេលាម៉ោង៥ល្ងាចថ្ងៃទី០៣ ខែកក្កដា ឆ្នាំ២០១៨នេះ ជនរងគ្រោះ២នាក់បងប្អូនជិះម៉ូតូវិលត្រឡប់មកពីធ្វើការវិញ កាត់តាមផ្លូវក្លោងទ្វារវត្តតាំងកសាង មុខព្រលានយន្តហោះពោធិ៍ចិនតុង ស្រាប់តែប្រទះឃើញជនសង្ស័យកំពុងធ្វើការងារ សំណង់ នៅក្នុងភូមិក្បាលដំរី១ សង្កាត់កាកាប១ រាយការណ៍ប្រាប់ប៉ូលិស ហើយចាប់ឃាត់ខ្លួនប្រគល់ឲ្យប៉ូលិសប៉ុស្តិ៍ចោមចៅ៣តែម្តង ។

ជនសង្ស័យក្រោយចាប់ខ្លួនបាន សារភាពដំបូងថាគេឆបោកយកទៅបាត់បន្ត ម្តងថាយកទៅបញ្ចាំបានលុយ៦០០ដុល្លារ ចុងក្រោយទើបសារភាពថា ខ្លួនយកទៅលក់បានលុយ៧០០ដុល្លារ នៅម្តុំអូរឫស្សី លក់ទាំងទូរស័ព្ទអាយហ្វូន៦ ទៀតផង ហើយគេចខ្លួន ឈប់ចូលបន្ទប់ជួល ទៅជួលកន្លែងផ្សេង រហូតដល់ថ្ងៃ ចាប់ខ្លួននេះតែម្តង ។

ជនសង្ស័យផ្អែកលើបណ្តឹងជនរងគ្រោះ តំកល់ទុកពីមុនមកស្រាប់ សមត្ថកិច្ចឃាត់ខ្លួនសាកសួរ និងកសាងសំណុំរឿងបញ្ជូនទៅផ្នែកជំនាញអធិការដ្ឋាន បន្តតាមនីតិវិធី ៕

Loading...