Post News Media ព័ត៌មានជាតិ ណូម័រ សូមទោស ...

ណូម័រ សូមទោស ឆាយ វិរ:យុទ្ធ

ភ្នំពេញ: គេនៅចាំច្បាស់ថា កាលពីថ្ងៃទី២១ ខែមិថុនា ឆ្នាំ២០១៦ តារាសម្តែង កញ្ញា ណូម័រ បានសរសេរសារនៅលើហ្វេសប៊ុកថា នាងត្រូវបាន ឆាយ វិរ:យុទ្ធ ចាប់រំលោភ ដោយព័ត៌មាននេះ បានសាយភាយពេញហ្វេសប៊ុក ដែលធ្វើឲ្យនាងសម្រេចចិត្ត សូមទោស ឆាយ វិរ:យុទ្ធ ជាសាធារណ:ទំនងជាតារាចម្រៀង សាន់ដេ ខឹងក្រាវក្រោធ។

ណូម័រ បានប្រាប់ Post News នៅព្រឹកថ្ងៃទី២៥ ខែមិថុនា ឆ្នាំ២០១៦ ឲ្យដឹងថា «នាងខ្ញុំណូម័រ សូមធ្វើការសុំទោសចំពោះបងប្រុស “ឆាយ វិរះយុទ្ធ” ជាសាធារណ:ចំពោះរឿង កាលថ្ងៃទី២១ ដែលនាងខ្ញុំបានបង្ហោះរូបភាពនឹងអក្សរថា “ថ្ងៃនេះ ត្រូវលោកឆាយ វិរះយុទ្ធចាប់រំលោភ ចឹងល្ងាចនេះមិនបានទៅធ្វើជាពិធីការនីការប្រគំតន្ត្រីរាត្រីណាត់ជួបនៅកំពូល ចោមចៅទេ”»

ពិធីការិនី និងជាតារាសម្តែង កំពុងបោះសំឡេងក្នុងពិភពសិល្ប: បានបន្តថា «តាមពិតនាងខ្ញុំ គ្រាន់តែចង់បញ្ជាក់ថា ថ្ងៃនេះមិនបានទៅធ្វើជាពិធីការិនីទេ ព្រោះរវល់ជាប់ថតបទថ្មីបងយុទ្ធ ប៉ុន្តែពេលដែលនាងខ្ញុំបង្ហោះទៅក្នុងហ្វេសប៊ុក ស្រាប់តែមិត្តៗចែករំលែករូបភាពនឹងអក្សរទាំងនោះឡើងផ្អើលហ្វេសប៊ុក រហូតដល់ថ្នាក់បងៗសារព័ត៌មានចុះព័ត៌មាន ចុះកាសែតទៀត»

នាងបានបន្ថែមក្នុងន័យដឹងកំហុសថា «ហេតុនេះ ធ្វើឲ្យប៉ះពាល់កិត្តិយសបងយុទ្ធ ព្រោះតែការលេងសើចខ្វះការពិចារណារបស់ខ្ញុំដោយអចេតនា ទោះបីបងយុទ្ធគាត់មិនប្រកាន់ ប៉ុន្តែនាងខ្ញុំក៏មិនអាចនៅស្ងៀមបានដែរ នាងខ្ញុំជាអ្នកខុស នាងខ្ញុំត្រូវតែមានទំនួលខុសត្រូវ!!! អរគុណចំពោះការស្រលាញ់រាប់អានរបស់ពុកម៉ែបងប្អូនទាំងក្នុងនឹងក្រៅហ្វេសប៊ុក ដោយក្តីគោរពពីនាងខ្ញុំ NoMore»