ព្រះសីហនុៈ ករណីគ្រោះថ្នាក់មួយ បានកើតឡើងដោយបុរសម្នាក់ កំពុងជិះម៉ូតូសុខៗ ស្រាប់តែខ្យល់បក់រលំស្លាកពុះដីឡូត៍លក់ធ្លាក់ចំ បណ្ដាលឲ្យរបួសធ្ងន់ ស្លាប់ពេលបញ្ជូនដល់មន្ទីរពេទ្យ។
ហេតុការណ៍នេះ កើតទ្បើងនៅព្រឹកថ្ងៃទី១៤ ខែកក្កដា ឆ្នាំ២០១៨ នៅលើផ្លូវជាតិលេខ៤ ម្តុំចំណោតអូរត្រាវក្រុមទី១៧ ភូមិ១ សង្កាត់លេខ១ ក្រុងឬខេត្តព្រះសីហនុ។
តាមសមត្ថកិច្ច បានឲ្យដឹងថា ជនរងគ្រោះឈ្មោះ មិញ បូរ៉េត ភេទ ប្រុស អាយុ ៥៦ឆ្នាំ មុខរបរកម្មករ រោងចក្រស្រាបៀរអង្គរ មានទីលំនៅភូមិពូធឿង ឃុំបិតត្រាង ស្រុកព្រៃនប់ ខេត្តព្រះសីហនុ បានជិះម៉ូតូម៉ាក HONDA C125 ពណ៌ ខ្មៅ ពាក់ស្លាកលេខព្រះសីហនុ 1-8387 មានទិសដៅចេញពីរោងចក្រស្រាបៀរអង្គរ ឆ្ពោះទៅផ្ទះ នៅភូមិពូធឿង លុះដល់ចំណុចខាងលើ ក៏ត្រូវស្លាកពុះដីលក់ ដែលត្រូវខ្យល់បក់រលំធ្លាក់ចំ បណ្ដាលឲ្យរងរបួសធ្ងន់ ត្រូវបានសមត្ថកិច្ច ហៅរថយន្តសង្គ្រោះបញ្ជូនទៅកាន់គ្លីនិកមិត្តភាពឃ្លាំងលើ តែដោយសារជនរងគ្រោះរបួសធ្ងន់ពេក ក៏បញ្ជូនបន្តមកមន្ទីរពេទ្យបង្អែកខេត្ត ចុងក្រោយក៏បានស្លាប់ នៅក្នុងមន្ទីរពេទ្យតែម្ដង៕
មតិយោបល់