ព័ត៌មានជាតិ

ម៉ូតូ២គ្រឿងពន្លះគ្នាលាន់ដូចរន្ទះ របួសធ្ងន់ទាំងសងខាង

ភ្នំពេញ: មនុស្សចំ​នួន២នាក់ ត្រូវបានរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ខណ:ដែលជិះម៉ូតូបោះពួយបុកគ្នាពេញទំហឹង។

​ហេតុការណ៍​នេះបានកើតឡើងកាលពីវេលាម៉ោង១២ថ្ងៃត្រង់​ថ្ងៃទី២០ ​ខែកក្កដា​ ឆ្នាំ២០១៨​ នៅចំណុចជិតរង្វង់មូលចោមចៅ តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់ចោមចៅទី៣​ ខណ្ឌពោធិ៍​សែនជ័យ រាជធានីភ្នំពេញ​។

​តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញម៉ូតូម៉ាកហុងដាឌ្រីមសង់​ ស៊េរីឆ្នាំ២០១០​ ពណ៌ខ្មៅ​ ពាក់ស្លាកលេខ តាកែវ 1D-8209 បើកបរដោយបុរសម្នាក់ ធ្វើដំណើរតាមបណ្តោយផ្លូវមហាវិថីសហព័ន្ធរុស្ស៊ី ​ក្នុងទិសដៅពីតើតទៅលិច ខណ:មកដល់ចំណុចកើតហេតុស្រាប់តែមានម៉ូតូម៉ាកហុងដាឌ្រីមសង់​ សេរីឆ្នាំ២០១៣​ ពណ៌ខ្មៅ​ ពាក់ស្លាកលេខ បាត់ដំបង​ 1V-8871 បើកបរដោយបុរសម្នាក់ធ្វើដំណើរបញ្ច្រាសទិសចរាចរណ៍ឆ្លងផ្លូវមកក៏ចាប់ហ្វ្រាំងមិនទាន់បុកគ្នាពេញទំហឹងតែម្តង បណ្តាលឲ្យភាគីខាងម៉ូតូឆ្លងផ្លូវរបួសបាក់ជើងខាងឆ្វេង។ ចំណែកភាគីម្ខាងទៀតរងរបួសធ្ងន់។

​ក្រោយពេលកើតហេតុជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ។ ចំណែកម៉ូតូត្រូវបាននគរបាលធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យរង់ចាំដោះស្រាយពេលក្រោយ៕

មតិយោបល់