ភ្នំពេញ: កម្លាំងនគរបាលប៉ុស្តិ៍ចោមចៅ៣ ខណ្ឌពោធិ៍សែនជ័យ សហការជាមួយប្រជាពលរដ្ឋ បានបង្ក្រាប និងឃាត់ខ្លួន ជនសង្ស័យចំនួន៣នាក់ ពាក់ព័ន្ធនឹងករណីលួចយ៉ាងសកម្ម ។
ប្រតិបត្តិការនេះ បានធ្វើទ្បើងកាលពីវេលាម៉ោង៥ និង១០នាទីល្ងាច ថ្ងៃទី២២ ខែកក្កដា ឆ្នាំ២០១៨ ស្ថិតក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិសែនជ័យ ។
តាមសមត្ថកិច្ច បានឲ្យដឹងថា ការឃាត់ខ្លួនជនសង្ស័យខាងលើ ក្រោយពីទទួលបានបណ្តឹងពីប្រជាពលរដ្ឋ នៅភូមិព្រៃទា ភូមិព្រៃជីសាក់ ជុំវិញសកម្មភាពបទល្មើសលួច គាស់ផ្ទះ ទើបកម្លាំងសមត្ថកិច្ច សហការជាមួយបងប្អូនប្រជាពលរដ្ឋ តាមចាប់ខ្លួនជនសង្ស័យទាំង៣នាក់។
ជនសង្ស័យទី ១ឈ្មោះ នាង សុវណ្ណរ៉ា ភេទប្រុស អាយុ២៨ឆ្នាំ មុខរបរជាងផ្សារដែក រស់នៅភូមិព្រៃព្រីងខាងត្បូង២ សង្កាត់ចោមចៅ៣ ខណ្ឌពោធិ៍សែនជ័យ ទី២ ឈ្មោះ ស ស៊ីប៉ាវ ភេទប្រុស អាយុ២៦ឆ្នាំ មុខរបរ កម្មកបោកអ៊ុតសម្លៀកបំពាក់ រស់នៅភូមិ ព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ និងទី៣ ឈ្មោះ ឈឿន សុជាតិ ហៅណាក់ ភេទប្រុស អាយុ២២ឆ្នាំ មុខរបរ កម្មករលើកកង់រថយន្ត ។
ចំណែកជនរងគ្រោះ ឈ្មោះ រាជ ពីឡុត ភេទប្រុស អាយុ៣០ឆ្នាំ មុខរបរធ្វើការ ផ្នែកគណនេយ្យ រស់នៅភូមិកើតហេតុខាងលើ ។
ប្រភពដដែលបន្ដថា កន្លងមកជនសង្ស័យគេចខ្លួនរួចរហូត តែក្រោយពីធ្វើសកម្មភាពលើកចុងក្រោយ កាលពីថ្ងៃទី១៨ ខែកក្កដា សមត្ថកិច្ចបានស្នើសុំឲ្យពលរដ្ឋ ចូលរួមសហការជាមួយ ទើបអាចឈានដល់ការចាប់ខ្លួន ជនសង្ស័យមេក្លោង ឈ្មោះ ស ស៊ីប៉ាវ និងបន្តចាប់ខ្លួនបក្ខពួក សរុប៣នាក់ នាំទៅសាកសួរ និងកសាងសំណុំរឿង បញ្ជូនទៅផ្នែកជំនាញអធិការដ្ឋានខណ្ឌ ចាត់ការតាមនីតិវិធីច្បាប់៕
មតិយោបល់