ព័ត៌មានជាតិ

ជនសង្ស័យ ៥នាក់ ជាមុខសញ្ញាវាយប្លន់ម៉ូតូ ត្រូវសមត្ថកិច្ចឃាត់ខ្លួន ក្រោយធ្វើសកម្មភាពមិនប៉ុន្មានម៉ោងផង

ភ្នំពេញ: កម្លាំងនគរបាលប៉ុស្តិ៍ចោមចៅ១ ចោមចៅ៣ សហការជាមួយកម្លាំងជំនាញខណ្ឌ បានចុះបង្ក្រាប និងឃាត់ខ្លួនក្រុមចោរ ដែលដើរវាយប្លន់យកម៉ូតូ តាមផ្លូវពេលយប់ចំនួន៥នាក់ ក្រោយក្រុមជនសង្ស័យទាំងនោះ បានធ្វើសកម្មភាពវាយប្លន់យកម៉ូតូពីយុវជនមានគ្នា៣នាក់ បានសម្រេច រួចជិះគេចខ្លួន តែត្រូវបានកម្លាំងសមត្ថកិច្ច ប្រកាសតាមវិទ្យុទាក់ទង ក្រោយទទួលបណ្តឹងពីជនរងគ្រោះ និងតាមបញ្ជារបស់លោកវរសេនីយ៍ឯក យឹម សារ៉ាន់ អធិការខណ្ឌ បានចេញដេញតាមភ្លាមៗ ឃាត់ខ្លួនបានជាបន្តបន្ទាប់។

ហេយុការណ៍នេះ បានកើតទ្បើងកាលពីវេលាម៉ោង៩ និង២០នាទីយប់ថ្ងៃទី២៤ ខែកក្កដា ឆ្នាំ២០១៨ នៅតាម​បណ្ដោយ​ផ្លូវ​វេងស្រេង ​ទល់មុខ​ក្លិប​ស្ពាយឌ័រ​ ភូមិ​ត្រពាំង​ថ្លឹង​ សង្កាត់​ចោមចៅ​១ ខណ្ឌ​ពោធិ​សែនជ័យ ។

ជនរងគ្រោះ​ឈ្មោះ​ហ៊ុយ​ មករា ភេទប្រុស​ ១៨ឆ្នាំ ​មុខរបរ​សិស្ស​ មានទីលំនៅភូមិ​ ភូមិ​ត្រពាំង​ថ្លឹង​ សង្កាត់​ចោមចៅ​១ខ ណ្ឌ​ពោធិ​សែនជ័យ ​មាន​ស្រុកកំណើតនៅ​ភូមិ​បឹង ឃុំរកា ​ស្រុក​កណ្តាល​ស្ទឹង​ ខេត្ត​កណ្ដាល​។

ម៉ូតូដែលក្រុមចោរវាយប្លន់ យកទៅនោះ ម៉ាកហុងដា សេ១២៥ ស៊េរី​២០១៧ ​ពណ៌​ខ្មៅ ​ពាក់ស្លាក​លេខ​ ភ្នំពេញ​1GC-2337 ។ ចំណែកម៉ូតូដែលជនសង្ស័យ និងបក្ខពួក ជិះធ្វើសកម្មភាពប្លន់កន្លងមក មាន២គ្រឿង មួយគ្រឿងម៉ាក ហុងដា សេ១១០ ប៊ិច ស៊េរី ២០១២ ពណ៌ខ្មៅ ​ពាក់ស្លាកលេខ ​ភ្នំពេញ​1BM-7108 និង​មួយ​គ្រឿង​ទៀត ម៉ាកហុងដា សេ១១០ ប៊ិច ពណ៌ខៀវ​ ពាក់ស្លាកលេខ ​ភ្នំពេញ​1BH-4814 ។

ជនសង្ស័យទាំង៥នាក់ ដែលសមត្ថកិច្ចឃាត់ខ្លួនបាន រួមមាន៖ ​ទី​១ ឈ្មោះ​ នុត​ សិត ហៅអា​វែង ភេទប្រុស​ ជា​បងធំ ប្រចាំក្រុម អាយុ​​២១ឆ្នាំ ​មុខរបរ​​ កម្មករ​សំណង់ពេលថ្ងៃ ពេលយប់ដើរប្លន់​ ស្នាក់នៅភូមិ​ទួល​ពង្រ​ សង្កាត់​ចោមចៅ​១ ខណ្ឌ​ពោធិសែនជ័យ​ មាន​ភូមិ​កំណើត​ភូមិ​ព្រៃ​ធំ​ ឃុំព្រៃធំ​ ស្រុក​កំពងរោទ៍​ ខេត្ត​ស្វាយ​រៀង​ ទី​២ ឈ្មោះ​ សៀម​ វណ្ណរី ភេទប្រុស អាយុ​១៧ឆ្នាំ​ មុខរបរ​ ជាង​ពិដាន​ ស្នាក់នៅសង្កាត់​អូរបែក​ក្អម​ ខណ្ឌសែនសុខ មាន​ស្រុក​កំណើត ​នៅ​ភូមិ​កៀន​តាសៀវ ឃុំ​ស្វាយ​យ៉ា​ ស្រុក​ស្វាយ​ជ្រុំ​ ខេត្ត​ស្វាយ​រៀង​ ទី​៣​ ឈ្មោះ សៀម​ វណ្ណរ៉ា ហៅឆាង​ ភេទ​ប្រុស ​អាយុ​២២ឆ្នាំ ​មុខរបរ​ ធ្វើចោរ​ ស្នាក់នៅភូមិ​ត្រពាំង​ឈូក​ សង្កាត់​អូរបែក​ក្អម​ ខណ្ឌសែនសុខ មាន​ស្រុក​កំណើត​កៀន​តាសៀវ ឃុំ​ស្វាយ​យ៉ា​ ស្រុក​ស្វាយ​ជ្រំ​ ខេត្ត​ស្វាយ​រៀង​ ទី​៤​ ឈ្មោះ​ ម៉ៅ​ ថែល ភេទប្រុស អាយុ​២៥ឆ្នាំ​ មុខរបរ​ ទើបចូលរួមជាសមាជិកក្រុមខាងលើ មាន​ស្រុកកំណើត ​ភូមិ​ ចម្ការ​គួយ​ ឃុំដំរី​ពួន​ ស្រុក​ស្វាយ​អន្ទរ​ ខេត្ត​ព្រៃវែង​ និងទី​៥ ឈ្មោះ​ លៀប​ អ៊ីសា​ ភេទប្រុស អាយុ២២ឆ្នាំ មុខរបរ សមាជិកក្រុមប្លន់ ​ស្នាក់នៅផ្ទះឡ​ ភូមិ​ត្រពាំង​ថ្លឹង​ សង្កាត់​ចោមចៅ​១ ខណ្ឌ​ពោធិ​សែនជ័យ​ មាន​ស្រុកកំណើតនៅ​ភូមិ​ព្រៃ​លាន​ ឃុំ​រំលេច​ ស្រុក​ស៊ីធរកណ្តាល​ ខេត្ត​ព្រៃវែង។

តាមសម្តីពីជនរងគ្រោះ បានឲ្យដឹងថា មុនកើតហេតុ ខ្លួនបានជិះម៉ូតូពីរគ្រឿង រួមជាមួយមិត្តភក្ដិ មានគ្នា៣នាក់ មកពីភូមិព្រៃស សង្កាត់ព្រៃ ខណ្ឌដង្កោ ក្នុងគោលបំណងវិលទៅផ្ទះ ផ្លូវវេងស្រេង មុខក្លឹបស្ពាយឌ័រ ភូមិត្រពាំងថ្លឹង សង្កាត់ចោមចៅ១ លុះធ្វើដំណើរមកដល់ចំណុចស្ពានថ្ម ខាងជើងក្បែរផ្សារទួលពង្រ ស្រាប់តែលេចមុខ ជនសង្ស័យមានគ្នា ៥នាក់ បានជិះម៉ូតូសេ១១០ ប៊ិច ចំនួន២គ្រឿង មកគំរាមវាយ ធ្វើឲ្យភ័យនាំគ្នា បើកម៉ូតូរត់ រហូតដល់មុខក្លឹបស្ពាយឌ័រ ក្បែរផ្ទះ ស្រែកឲ្យគេឯងជួយ តែគ្មានលទ្ធផល ត្រូវបានក្រុមចោរ ទាំង៥នាក់ ប្រដាប់ដោយដុំថ្ម ខ្សែក្រវ៉ាត់ វាយបណ្តាលឲ្យបែកក្បាល ហើយយកម៉ូតូជិះគេចខ្លួន តាមផ្លូវវេងស្រេង ឆ្ពោះទៅកើតចំនួន២គ្រឿង ក្នុងនោះម៉ូតូជនរងគ្រោះ១គ្រឿង និងម៉ូតូជនល្មើសមួយគ្រឿង ចំណែកម៉ូតូ ជនល្មើសមួយគ្រឿងទៀត សេ១១០ ពណ៌ខៀវ ដែលស្គាល់ច្បាស់ជាងគេ បើកគេចតាមផ្លូវវេងស្រេង ឆ្ពោះទៅលិច ។

ក្រោយកើតហេតុភ្លាម ជនរងគ្រោះរត់ទៅប្តឹងនៅប៉ុស្តិ៍ប៉ូលិសចោមចៅ១ ភ្លាមៗ ដែលនៅក្បែរនោះ ទើបកម្លាំងសមត្ថកិច្ច ស្រែកប្រកាសតាមប្រព័ន្ធវិទ្យុទាក់ទង ដើម្បីឲ្យកម្លាំង ដែលប្រចាំការតាមគោលដៅតាមប៉ុស្តិ៍ ប្រដេញ និងចេញស្វែងរក ភិនភាគជនសង្ស័យ រួមនឹងម៉ូតូខាងលើ ទីបំផុត កម្លាំងនគរបាលប៉ុស្តិ៍ចោមចៅ៣ ក៏ប្រទះជួបជនសង្ស័យ ជិះម៉ូតូ ភិនភាគប្រកាសខាងលើ តាមផ្លូវសហព័ន្ធរុស្សី មុខវត្តទួលសុភាឃួន ភូមិព្រៃជីសាក់ ទើបចាប់ខ្លួនបាន២នាក់ នាំទៅសាកសួរនៅផ្នែកជំនាញ ហើយនាំបន្តទៅតាមឃាត់ បក្ខពួកចោរប្លន់ បានជាបន្តបន្ទាប់៣នាក់ទៀត នៅតាមផ្លូវវេងស្រេង ភូមិត្រពាំងថ្លឹង សង្កាត់ចោមចៅ១ សរុបចាប់បាន៥នាក់ និងម៉ូតូ២គ្រឿង ។

ក្រោយ​ពេល​កើត​ហេតុ​ ជនសង្ស័យឃាត់ខ្លួន យកទៅសាកសួរនៅប៉ុស្តិ៍​ចោមចៅ១ ដើម្បីកសាង​សំណុំ​រឿង​បញ្ជូន​ទៅ​ជំនាញ​ផ្នែក​ព្រហ្មទណ្ឌ ​ចាត់​ការ​តាមនីតិវិធី ​៕

មតិយោបល់