សៀមរាប: កាលពីវេលាម៉ោង២រសៀលថ្ងៃទី១៤ ខែសីហា ឆ្នាំ២០១៨ សមត្ថកិច្ចបានទទួលព័ត៌មានពីបុគ្គលិកសណ្ឋាគារ​ GOLDEN BUTTERFLY VILLA ថាមានករណីជនបរទេសស្លាប់​។

ភ្លាមៗនោះកម្លាំងសមត្ថកិច្ចបានចុះទៅដល់កន្លែងកើតហេតុពិនិត្យឃើញថា​ ជនរងគ្រោះឈ្មោះ​ GILDRED JOSEPH DANIEL ភេទ​ប្រុស​ កើតឆ្នាំ​១៩៧៧​ ជនជាតិ​អាមេរិចកាំង​ កាន់លិខិតឆ្លងដែនលេខ​ ៤៨៤០៨១៣៨៨​ ជាភ្ញៀវទេសចរ បានដេកស្លាប់នៅក្នុងបន្ទប់លេខ១១០នៃសណ្ឋាគារខាងលើ។
ជនរងគ្រោះចូលមកព្រះរាជាណាចក្រកម្ពុជាកាលពីថ្ងៃទី១​ ខែ​សីហា​ ឆ្នាំ​២០១៨​ តាមច្រកព្រលានយន្តហោះអន្តរជាតិសៀមរាប​ ស្នាក់នៅបន្ទប់លេខ​១១០​ សណ្ឋាគារ​ GOLDEN BUTTERFLY VILLA ភូមិ​ស្ទឹងថ្មី​ សង្កាត់​ស្វាយដង្គំ​ ក្រុងសៀមរាប ខេត្តសៀមរាប។

ផ្អែកតាមការស្រាវជ្រាវរបស់សមត្ថកិច្ចជំនាញនិងលោកវេជ្ជបណ្ឌិត​ គង់​ រិទ្ធី​ គ្រូពេទ្យនៅមន្ទីរពេទ្យបង្អែកខេត្តសៀមរាបបានសន្និដ្ឋានថា ជនរងគ្រោះបានស្លាប់តាំងពីថ្ងៃទី​១៣​ ខែ​សីហា​ ឆ្នាំ​២០១៨​ ដោយជំងឺស្ទះសរសៃឈាមបេះដូង-ដាច់សរសៃឈាមខួរក្បាល។

សាកសពកំពុងរៀបចំបញ្ជូនទៅតម្កល់ទុកបណ្តោះអាសន្ននៅមន្ទីរពេទ្យមិត្តភាពខ្មែរ-សូវៀត(ពេទ្យរុស្ស៊ី)រាជធានីភ្នំពេញ តាមសំណូមពររបស់ក្រុមគ្រួសារនិងតំណាងស្ថានទូត៕