ភ្នំពេញៈ រថយន្ដតូរីកមួយគ្រឿង បើកបុកពីក្រោយរថយន្ដព្រូសមួយគ្រឿងរួចមិនព្រមដោះស្រាយ ជិះរត់គេចខ្លួន ត្រូវភាគីរថយន្ដព្រូសបើកតាមរួចគៀរថយន្ដតូរីកគៀបជាប់និងរបាំថ្មពុះចែកទ្រូង កាលពីវេលាម៉ោង១២និង៣០នាទីរំលងអាធ្រាត្រ ឈានចូលថ្ងៃទី២៨ ខែមិថុនា ឆ្នាំ២០១៦ ត្រង់ចំណុចជិតខាងត្បូង ស្ដុកទេពផន តាមបណ្ដោយផ្លូវម៉ៅសេទុង ស្ថិតក្នុងសង្កាត់ទឹកល្អក់៣ខណ្ឌទួលគោក។
តាមប្រភពព័ត៌មានបានឲ្យដឹងថា មុនពេលកើតហេតុ គេឃើញបុរសម្នាក់បើករថយន្ដមួយគ្រឿងម៉ាកតូរីក ពណ៌ខៀវ ពាក់ស្លាកលេខភ្នំពេញ 2AB-4149 បើកបរក្នុងស្ថានភាពស្រវឹង តាមបណ្ដោយផ្លូវម៉ៅសេទុង ក្នុងទិសដៅពីជើងទៅត្បូងទៅបុកពីក្រោយរថយន្ដម៉ាកព្រូសមួយគ្រឿង ពណ៌ទឹប្រាក់ ពាក់ស្លាកលេខភ្នំពេញ2A-1552 បើកបរដោយបុរសម្នាក់ ធ្វើដំណើរតាមបណ្ដោយផ្លូវម៉ៅសេទុង ទិសដៅពីជើងទៅត្បូង(ស្របទិសគ្នា) រួចមិនព្រមដោះស្រាយ ហើយក៏ជិះរត់គេចខ្លួនត្រូវភាគីរថយន្ដព្រូសបើកតាមពីក្រោយ ខណៈមកដល់ចំណុចកើតហេតុ រថយន្ដព្រូសក៏គៀរថយន្ដតូរីកគៀបជាប់និងរបាំថ្មពុះចែកទ្រូង បណ្ដាលឲ្យរថយន្ដទៅមុខលែងរួច។
ក្រោយពេលកើតហេតុភាគីរថយន្ដតូរីកព្យាយាមសម្រប់សម្រួលភាគីរថយន្ដព្រូស តែដោយរថយន្ដទាំង២បុកនិងរបាំងថ្មពុះចែកទ្រូងផ្លូវ សមត្ថកិច្ចជំនាញចរាចរណ៍ជើងគោកចុះមកធ្វើការវាស់វែងយករថយន្ដទាំង២ទៅរក្សារទុកនៅការិយាល័យចរាចរណ៍ជើងគោក ដើម្បីរងចាំធ្វើការដោះស្រាយតាមនីតិវិធី៕
មតិយោបល់