កណ្តាលៈ កាលពីវេលាម៉ោង៨និង៣០នាទីយប់ ថ្ងៃទី២៤ ខែសីហា ឆ្នាំ២០១៨ សមត្ថកិច្ចឃាត់ខ្លួនជនសង្ស័យម្នាក់ ករណីហិង្សាដោយចេតនាមានស្ថានទម្ងន់ និងបង្កគ្រោះថ្នាក់ចរាចរណ៍បើករថយន្តបុករះ នៅ ចំណុចក្រុមហ៊ុន 7NG ភូមិព្រៃចាស់ ឃុំវិហាសួគ៌ ស្រុកខ្សាច់កណ្តាល ខេត្តកណ្តាល។
ជនរងគ្រោះ០១នាក់ ឈ្មោះ នូ វណ្ណៈ ភេទ ប្រុស អាយុ ៤៥ ឆ្នាំ ជនជាតិខ្មែរ មុខរបរយោធាឆ័ត្រយោង ៩១១ មានទីលំនៅភូមិព្រៃនប់ សង្កាត់ព្រៃនប់ ខណ្ឌព្រៃនប់ ក្រុងព្រះសីហនុ
បច្ចុប្បន្នស្នាក់នៅក្នុងក្រុមហ៊ុន 7NG (របួសមុតថ្ពាល់ស្តាំ០១កន្លែង ខូចខាតម៉ូតូ០៣គ្រឿង) ជនសង្ស័យមានគ្នា៧នាក់ ឃាត់ខ្លួនម្នាក់ឈ្មោះជាង ហេង អាយុ ៣៤ឆ្នាំ ជនជាតិខ្មែរ មុខរបរបើកបររថយន្ត មានទីលំនៅភូមិថ្នល់បត់ ឃុំបានកាម ស្រុកព្រៃកប្បាស ខេត្តតាកែវ( ឃាត់ខ្លួន)ដកហូតវត្ថុតាងមាន
រថយន្ត១គ្រឿងម៉ាក HINO ក្បាលរថយន្ត ពាក់ផ្លាកលេខ ព្រះសីហនុ3A.6531 កន្ទុយសណ្តោងពាក់ផ្លាកលេខ
ភ្នំពេញ 4A-4608 ពណ៌ខៀវ ម៉ូតូចំនួន៣គ្រឿង ។
មុនពេលកើតហេតុ ក្រុមជនសង្ស័យបានបើករថយន្តមានផ្លាកលេខខាងលើ ទៅផឹកស៊ីនៅហាងតែគុជ ក្នុងក្រុមហ៊ុន7NG ហើយពេលបំរុងបើករថយន្តចេញ ក៍មានទំនាស់ពាក្យសំដីជាមួយឈ្មោះ ធី បន្ទាប់មកក្រុមជនសង្ស័យបានយកពូថៅពីក្នុងរថយន្តរបស់ខ្លួនដេញកាប់ឈ្មោះធី ស្របពេលនោះកម្លាំងប៉ុស្តិ៍នគរបាលវិហារសួគ៌ និងកម្លាំងឆ័ត្រយោងចុះល្បាត បានមកដល់ក៍បានឃើញនូវហេតុការណ៍ កម្លាំងនគរបាលប៉ុស្តិ៍ និងកម្លាំងឆ័ត្រយោង៩១១បានចុះសួរនាំពីរឿងហេតុ ស្រាប់តែក្រុមជនសង្ស័យប្រដាប់ដោយពូថៅ ដែកបំពង់ទីប គ្រប់ដៃស្ទុះរត់មកកាប់ទៅលើកម្លាំងប៉ុស្តិ៍ និងកម្លាំងឆ័ត្រយោង៩១១បណ្តាលឲ្យត្រូវជនរងគ្រោះឈ្មោះនូ វណ្ណៈ ចំថ្ពាល់ខាងស្តាំ មួយកន្លែង ត្រូវដើមដៃស្តាំមួយកន្លែងរងរបួស ហូរឈាមកម្លាំងយើងក៍ដកថយ។
បន្ទាប់មកក្រុមជនសង្ស័យបាននាំគ្នាឡើងលើរថយន្ត បើកចេញហើយបានធ្លាក់ជនសង្ស័យម្នាក់ពីលើរថយន្ត និងបើកកិនម៉ូតូបណ្តាលឲ្យខូចខាត៣គ្រឿង ពេលនោះកម្លាំងឆ័ត្រយោង៩១១ បានបាញ់ទៅលើរថយន្តជនសង្ស័យ តែរថយន្តរបស់ជនសង្ស័យមិនបានឈប់នៅតែបើកបន្តទៅមុខទៀត ហើយលោកនាយប៉ុស្តិ៍វិហារសួគ៌បានរាយការណ៍ជូនលោកអធិការជួយអន្តរាគមន៍ ភ្លាមនោះកម្លាំងអធិការដ្ឋាននគរបាលស្រុកបានចេញអន្តរាគមន៍ ដោយយករថយន្តសឺរ៉ែន ដាក់ពាំងផ្លូវចំណុចរង្វង់មូលគល់ស្ពានព្រែកតាមាក់ស្រាប់តែរថយន្តជនសង្ស័យបានបើកបំបុករថយន្តសឺរ៉ែនរបស់សមត្ថកិច្ចបណ្តាលឲ្យខូចខាតពេលកម្លាំងបានផ្ទុះអាវុធបាញ់ឡើងលើចំនួន៣គ្រាប់។
បន្ទាប់មកកម្លាំងនគរបាលស្រុកខ្សាច់កណ្ដាល បានសហការជាមួយកម្លាំងនគរបាលស្រុកមុខកំពូល ដេញតាមរថយន្តជនសង្ស័យពីក្រោយពេលជនសង្ស័យបើករថយន្តដល់ចំណុចវត្តរកាកោង ក្រុមជនសង្ស័យបានរត់គេចខ្លួនបន្សល់ទុកតែរថយន្ត បន្ទាប់មកកម្លាំងសមត្ថកិច្ចនគរបាលបានយករថយន្តនេះ មករក្សាទុកនៅអធិការដ្ឋាននគរបាលស្រុកខ្សាច់កណ្តាល បន្តចាត់ការតាមនីតិវិធី៕
មតិយោបល់