ភ្នំពេញៈ លោក ថាន់ ឡេង ប្រធានក្រុមប្រឹក្សាចៅក្រមជំនុំជម្រះ នៃសាលាដំបូងរាជធានីភ្នំពេញ នៅព្រឹកថ្ងៃទី១១ ខែកញ្ញា ឆ្នាំ២០១៨នេះ បានបើកសវនាការប្រកាសសាលក្រម សំណុំរឿង ឃាតកម្មគិតទុកជាមុន ដោយបានសម្រេចដាក់គុក មេក្លោង អស់មួយជីវិត និងចេញដីកាតាមចាប់ខ្លួនគូកន មកដាក់គុក ២០ឆ្នាំ។

សាលក្រមរបស់តុលាការបានសម្រេចផ្តន្ទាទោសជនជាប់ចោទឈ្មោះ រស់ រីម ភេទប្រុស អាយុ ២៨ឆ្នាំ ដាក់ពន្ធនាគារ កំណត់រយៈពេល អស់ មួយជីវិត និងឈ្មោះ ផាត ពេជ្រ ភេទប្រុស អាយុ ១៩ឆ្នាំ (កំពុងរត់គេចខ្លួន) ដាក់ពន្ធនាគារកំណត់ ២០ឆ្នាំ និងចេញដីកាចាប់ខ្លួន ពីបទ ឃាតកម្មគិតទុកជាមុន ប្រព្រឹត្តលើ ជនរងគ្រោះឈ្មោះ ទូច ម៉ារី ហៅ ចេង ភេទស្រី អាយុ ៣៤ឆ្នាំ កាលពីថ្ងៃទី១១ ខែឧសភា ឆ្នាំ២០១៧ នៅចំណុចនៅផ្ទះលេខ១២ ផ្លូវ ២០k ក្រុមទី៨ ភូមិចំការឳឡឹក សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ យោងតាមមាត្រា ២០០នៃក្រមព្រហ្មទណ្ឌ។

សាលក្រមដដែលបានបង្គាប់ឲ្យ ក្រុមជនជាប់ចោទ និងអាណាព្យាបាល រួមគ្នាសងសំណងជំងឺចិត្ត ទៅគ្រួសារជនរងគ្រោះ ចំនួន ៦០លានរៀលផងដែរ។

នៅក្នុងសវនាការ កាលពីពេលកន្លងទៅ ជនជាប់ចោទ ឈ្មោះ រស់ រីម បានសារភាពថា មូលហេតុដែលខ្លួន រឹតកសម្លាប់ជនរងគ្រោះ ព្រោះមានគំនុំ រឿងគ្រួសារជនរងគ្រោះ ដែលជាថៅកែលក់បន្លែនៅផ្សារពោធិ៍ចិនតុង និងត្រូវជាបងប្អូនសាច់ថ្លៃខាងប្រពន្ធផង បានបញ្ឈប់រូបគេពីការងារ។

ដោយខឹងគ្រួសារជនរងគ្រោះពេក ទើបជនជាប់ចោទឈ្មោះ រស់ រីម បានទៅស្រុកក្នុងខេត្តតាកែវ បបួលមិត្តភក្តិម្នាក់ឈ្មោះ ផាត ពេជ្រ ឲ្យមកសម្លាប់ស្ត្រីរងគ្រោះ ដោយសន្យា នឹងឈ្មោះ ផាត ពេជ្រ ថាពេលសម្លាប់រួច យកទ្រព្យសម្បត្តិចែកគ្នាស្មើ។

នៅថ្ងៃកើតហេតុ ជនជាប់ចោទឈ្មោះ រស់ រីម និងឈ្មោះ ផាត ពេជ្រ បានទៅផ្ទះជនរងគ្រោះដោយសុំជនរងគ្រោះ ចូលបន្ទប់ទឹក ចំពេលដែលប្តីជនរងគ្រោះ ចេញទៅលក់បន្លែនៅផ្សារបាត់ ទើបជនជាប់ចោទ បានយកខ្សែ គោ ប្រវែងមួយម៉ែត្រ រឹតកស្ត្រីរងគ្រោះ ដែលទើបនឹងសម្រាលកូន បាន ២ខែ ស្លាប់នៅក្នុងបន្ទប់ទឹក។

ក្រោយសម្លាប់ជនរងគ្រោះរួច ក្រុមជនជាប់ចោទ បានលួចយកលុយខ្មែរ ចំនួន ១០លានរៀល, លុយដុល្លារ ចំនួន ៧,២០០ដុល្លារ ខ្សែកមាស ចំនួន ០១ខ្សែ, ខ្សែកប្លាទីន ចំនួន ០១ខ្សែ និងចិញ្ជៀនពេជ្រ ចំនួន ០១។

គួររំលឹកថា ក្រោយកើតហេតុ កម្លាំងកងរាជអាវុធហត្ថរាជធានីភ្នំពេញ បានស្រាវជ្រាវ រហូតឈានដល់ ការឃាត់ខ្លួន ជនជាប់ចោទឈ្មោះ រស់ រីម បាននៅថ្ងៃទី១៨ ខែឧសភា ឆ្នាំ២០១៧ នៅចំណុចភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង៕