ផ្ទះ ព័ត៌មានជាតិ ភ្លៀងមួយមេកាត...

ភ្លៀងមួយមេកាត់ព្រឹក ផ្ដួលបង្គោលភ្លើង៤ដើម បាក់រលំដល់ដី និង៣ដើមទ្រេត

0

ភ្នំពេញ: តាមការជូនដំណឹងរបស់អគ្គិសនីកម្ពុជា នៅមុននេះបន្តិច មានបង្គោលភ្លើងចំនួន៤ដើម បានបាក់រលំដល់ដី និង៣ដើមផ្សេងទៀត ត្រូវបានទ្រេត បន្ទាប់ពីមានភ្លៀងធ្លាក់យ៉ាងខ្លាំងលាយឡំនឹងខ្យល់បោកបក់ នាព្រឹកថ្ងៃទី២៩ ខែមិថុនា ឆ្នាំ២០១៦។ បញ្ហានេះ អគ្គិសនីកម្ពុជា ថា ក៏បានបណ្ដាលឲ្យដាច់ចរន្តអគ្គិសនីពីតំបន់មួយចំនួននៅខណ្ឌសែនសុខ និងពោធិ៍សែនជ័យផងដែរ។

អគ្គិសនីកម្ពុជា បានជូនដំណឹងថា “នៅថ្ងៃទី29 ខែមិថុនា ឆ្នាំ2016 នៅវេលាម៉ោង11:04នាទី មានភ្លៀងធ្លាក់ច្រើនលាយឡំ នឹងខ្យល់បក់បោកខ្លាំង បណ្តាលឲ្យរលំបាក់បង្គោលបណ្តាញតង់ស្យុងមធ្យម(MV)ចំនួន4ដើម និងបណ្តាលឲ្យទ្រេតចំនួន3ដើម ដែលធ្វើឲ្យដាច់ចរន្តអគ្គិសនីពីអនុស្ថានីយទី5(GS5-F4) នៅតំបន់មួយចំនួនដែលស្ថិតនៅ (1) ភូមិត្រពាំងមាន ភូមិត្រពាំងជើងស្រុក ភូមិជាងទង ភូមិព្រៃខ្លា សង្កាត់ក្រាំងធ្នង់ និងភូមិម្លូផ្អែម សង្កាត់គោករការ ខណ្ឌសែនសុខ (2) ភូមិសាក់ប្រយុទ្ធ ភូមិស្រែជះ សង្កាត់ស្នោរ និងភូមិអណ្តូងតាអន ភូមិព្រៃពពេល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ”

ជុំវិញបញ្ហាភ្លៀងធ្លាក់ខ្លាំងបណ្ដាលឲ្យបាក់រលំ និងទ្រេតបង្គោលភ្លើងអស់៧ដើមខាងលើ អគ្គិសនីកម្ពុជា បានបញ្ជូនក្រុមការងារបច្ចេសទេសទៅធ្វើការជួសជុលដាំបង្គោលថ្មី និងរៀបចំខ្សែបណ្តាញ ដើម្បីឲ្យអតិថិជនឆាប់មានចរន្តអគ្គិសនីប្រើប្រាស់ឡើងវិញ តាមដែលអាចធ្វើទៅបាន។ អគ្គិសនីកម្ពុជា នឹងជូនព័ត៌មានបន្ថែមនៅពេលក្រោយ៕

Loading...