Post News Media ព័ត៌មានជាតិ ជនជាតិចិនប្រើ...

ជនជាតិចិនប្រើហិង្សា​គំរាមទារប្រាក់ពីជនជាតិចិនដូចគ្នា ត្រូវកម្លាំងនគរបាលខណ្ឌពោធិ៍សែនជ័យ ចាប់ខ្លួន៣នាក់ និង២នាក់ទៀតកំពុងរត់គេចខ្លួន!

ភ្នំពេញ: ជនជាតិចិនចំនួន៥នាក់ ដែលបុគ្គលិករបស់ក្រុមហ៊ុនកម្ចីប្រាក់ ហ័ងស៊ីង បានប្រើប្រាស់អំពើហិង្សា និងគំរាមទារប្រាក់ពីជនជាតិចិនដូចគ្នា ដែលជំពាក់ចំនួន៤៥,០០០ដុល្លារ ត្រូវបានកម្លាំងនគរបាលខណ្ឌពោធិ៍សែនជ័យ តាមចាប់ខ្លួនបាន៣នាក់ នៅថ្ងៃទី១៤ ខែកញ្ញា ឆ្នាំ២០១៨នេះ ខណ:ដែលជនដៃដល់២នាក់ទៀត កំពុងរត់គេចខ្លួន។

​លោកវរសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ បានថ្លែងប្រាប់ ឲ្យដឹងថា ហេតុការណ៍អំពើហិង្សាដែលបង្កឡើង ដោយ​ជនជាតិចិននេះ កើតឡើងនៅវេលាម៉ោង​៤និង៣០នាទី ថ្ងៃទី១២ ខែកញ្ញា ឆ្នាំ២០១៨ ស្ថិតនៅទីតាំងកម្ចីប្រាក់ ហ័ងស៊ីង ភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ។

លោកអធិការបានបញ្ជាក់ថា ជនសង្ស័យទាំង៣នាក់នោះ​ ទី១៖ឈ្មោះ Chen DongWen អាយុ៣៧ឆ្នាំ, ទី២៖ឈ្មោះ Ehen qiuzi អាយុ២៣ឆ្នាំ និងទី៣៖ឈ្មោះ Li QingMou អាយុ៤២ឆ្នាំ និងបក្ខពួក២នាក់ផ្សេងទៀត កំពុងរត់គេចខ្លួន។ ដោយឡែក ជនរងគ្រោះឈ្មោះ Li Shigang អាយុ៤៧ឆ្នាំ ម្ចាស់សិប្បកម្ម មានទីលំនៅក្រុងដូនកែវ ខេត្តតាកែវ។

អធិការនគរបាលខណ្ឌពោធិ៍សែនជ័យ បានរៀបរាប់ពីដំណើររឿងថា នៅថ្ងៃទី១២ ខែកញ្ញា ឆ្នាំ២០១៨ ជនរងគ្រោះ និងអ្នកបើកបរ បាននាំគ្នាជិះរថយន្ដមួយគ្រឿង ចេញពីសិប្បកម្មនៅក្រុងដូនកែវ ខេត្តតាកែវ ដើម្បីមកបើកប្រាក់ពីក្រុមហ៊ុន​ រោងចក្រថ្នល់ចិន ស្ថិតនៅស្រុកស្អាង ខេត្តកណ្ដាល។
លុះពេលមកដល់ជនរងគ្រោះបានបើកប្រាក់ពីក្រុមហ៊ុនថ្នល់ចិន បានប្រាក់ចំនួន ២៥,០០០ដុល្លារ បន្ទាប់ពីបើកប្រាក់បាន ជនរងគ្រោះត្រូវបាន ក្រុមហ៊ុនកម្ចីប្រាក់រហ័ស ហ័ងស៊ីង ទារប្រាក់ដែលជំពាក់ចំនួន ៤៥,០០០ដុល្លារ នៅខាងមុខរោងចក្រ ពេលនោះជនរងគ្រោះបានឯកភាពប្រគល់ប្រាក់ថ្លៃការ ឲ្យទៅក្រុមហ៊ុនកម្ចី ចំនួន៣,០០០ដុល្លារ។

ប៉ុន្ដែខាងក្រុមហ៊ុនកម្ចីមិនព្រម ក៏នាំជនរងគ្រោះមកការិយាល័យស្ថិតនៅភូមិព្រៃទា១ សង្កាត់ចោមចៅទី៣ នៅពេលនោះជនសង្ស័យទាំង៥នាក់ នាំជនរងគ្រោះដាក់លើរថយន្ដ និងបានធ្វើសកម្មភាពវាយទៅលើជនរងគ្រោះ បណ្ដាលឲ្យហើមកញ្ចឹងកផ្នែកខាងក្រោយ។ លុះពេលមកដល់ស្នាក់ការក្រុមហ៊ុន ហ័ងស៊ីង ស្រាប់តែនាំជនរងគ្រោះឡើងទៅជាន់ទី២ ហើយឲ្យជនរងគ្រោះប្រគល់ប្រាក់ឲ្យ នៅពេលជនរងគ្រោះមិនព្រមឲ្យក៏មានការឈ្លោះប្រកែកគ្នា ហើយជនរងគ្រោះបានរត់ចេញពីស្នាក់ការតែម្ដង។

ក្រោយមកទៀតជនរងគ្រោះបានទៅដាក់ពាក្យបណ្ដឹងនៅអធិការដ្ឋាននគរបាលស្រុកស្អាង ខេត្តកណ្ដាល ទើបអធិការដ្ឋាននគបាលស្រុកស្អាង ទាក់ទងមកអធិការដ្ឋាននគរបាលខណ្ឌពោធិ៍សែនជ័យ ដើម្បីបើកការស្រាវជ្រាវ និងឈានដល់ការចាប់ខ្លួនជនសង្ស័យបានចំនួន៦នាក់ ហើយសួរនាំទៅជាប់ពាក់ព័ន្ធ៣នាក់ ខណ:ដែល២នាក់ផ្សេងទៀត មិនទាន់ត្រូវបានចាប់ខ្លួននៅឡើយទេ។
បច្ចុប្បន្នជនសង្ស័យកំពុងឃុំខ្លួនបណ្ដោះអាសន្ននៅផ្នែកនគរបាលយុត្តិធម៌ នៃអធិការដ្ឋាននគរបាលខណ្ឌពោធិ៍សែនជ័យ ដើម្បីកសាងសំណុំរឿងចាត់ការបន្ដតាមនីតិវិធី៕​