ភ្នំពេញ: បុរសម្នាក់មិនដឹងថាយ៉ាងម៉េចក្នុងខ្លួននោះទេ ឲ្យតែបានផឹកស្រាស្រវឹងម្ដងៗ គឺតែងតែបង្ករឿងប្រើហិង្សានិងជេរប្រមាថទៅលើប្រពន្ធដែលមានវ័យចាស់ជាងខ្លួន ជាញឹកញាប់។
លុះលើកចុងក្រោយនេះ បន្ទាប់ពីត្រឡប់មកផឹកស៊ីជាមួយមិត្តភក្ដិខាងក្រៅវិញ បានជេរប្រមាថរួចយកកាំភ្លើងដែលមិត្តភក្តិជាមន្ត្រីនគរបាលម្នាក់ផ្ញើទុក បែរយកគំរាមបាញ់សម្លាប់ប្រពន្ធ ខណ:នោះដោយសារតែមានការភ័យខ្លាចប្ដីពេក ទើបស្ត្រីជាប្រពន្ធរត់ទៅប្ដឹងសុំការអន្តរាគមន៍ពីកម្លាំងនគរបាល ប៉ុស្តិ៍ចោមចៅ៣ឲ្យចុះឃាត់ខ្លួន កាលពីវេលាម៉ោង២ និង៥០នាទីទៀបភ្លឺ ថ្ងៃទី២៧ ខែកញ្ញា ឆ្នាំ២០១៨ ស្ថិតនៅចំណុចមុខផ្ទះលេខ១១០ ក្នុងភូមិព្រៃព្រីងខាងជើង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
បុរសជាប្តីខាងលើឈ្មោះ អ.ស.រ អាយុ៣៥ឆ្នាំ ជាអ្នកលក់ដូរ ត្រូវកម្លាំងដកហូតបានកាំភ្លើងខ្លី១ដើម ម៉ាកឡុកផលិតនៅប្រទេសអូទ្រីស បង់១ និងគ្រាប់ចំនួន១៥គ្រាប់។ រីឯប្រពន្ធឈ្មោះ ល.អ.អាយុ៤៨ឆ្នាំ ជាអ្នកលក់ដូរដែរ។
តាមប្រភពព័ត៌មានបានឲ្យដឹងទៀតថា កន្លងមក ប្ដី-ប្រពន្ធ១គូនេះ តែងតែឈ្លោះប្រកែកគ្នាជាញឹកញាប់ ខណ:ប្ដីផឹកស៊ីស្រវឹង។
បច្ចុប្បន្ន នគរបាលប៉ុស្តិ៍ចោមចៅ៣ បានឃាត់ខ្លួនបុរសជាប្ដីនាំទៅសាកសួរ ដើម្បីកសាងសំណុំរឿងនៅប៉ុស្តិ៍តែម្ដង។
ជននេះបានសារភាពប្រាប់នគរបាលថា ខ្លួនពិតជាបានរករឿងជេរប្រមាថ និងគំរាមសម្លាប់ប្រពន្ធមែន។ ហើយចំពោះកាំភ្លើងដែលខ្លួនប្រើនេះ គឺជារបស់មិត្តភក្តិម្នាក់ដែលជាមន្ត្រីនគរបាលនៅស្រុកសំពៅលូនដែលជាប់រវល់ទៅប្រទេសថៃ បានយកមកផ្ញើឲ្យខ្លួនរក្សាទុកបណ្ដោះអាសន្ន ។ ទោះបីជាបែបណា នៅមិនទាន់ដឹងថា ខាងនគរបាលមានចំណាត់ការបែបណាលើបុរសរូបនេះនៅឡើយទេ៕
មតិយោបល់