កំពង់ស្ពឺ: យោងតាមផេកអគ្គនាយកដ្ឋានកាំកុងត្រូល បានឲ្យដឹងថា នៅថ្ងៃអង្គារ ០៦រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ ខែតុលា ឆ្នាំ២០១៨ នេះ មន្រ្តីអគ្គនាយកដ្ឋានកាំកុងត្រូល បាននាំយករថយន្តពិសោធន៍ចល័តផ្នែកប្រេងឥន្ធន: ចុះត្រួតពិនិត្យគុណភាព បរិមាណ និងថ្លៃលក់រាយប្រេងឥន្ធន:នៅតាមបណ្ដាស្ថានីយ/ដេប៉ូ នៅខេត្តកំពង់ស្ពឺ បានចំនួន៩ទីតាំង។
ក្នុងការត្រួតពិនិត្យនេះ មន្រ្តីជំនាញបានធ្វើការវិភាគលើកម្រិតសន្ទស្សន៍អុកតានរបស់ប្រេងសាំង និងត្រួតពិនិត្យរង្វាស់រង្វាល់របស់បណ្ដាស្ថានីយ/ដេប៉ូលក់ប្រេងផងដែរ។
លទ្ធផលនៃការត្រួតពិនិត្យ មន្រ្តីជំនាញបានរកឃើញថាមានស្ថានីយ/ដេប៉ូចំនួន ៣ បានលក់ប្រេងមិនមានអនុលោមភាពទាំងផ្នែកគុណភាព និងបរិមាណ និងស្ថានីយ ចំនួន០១ មិនមានអនុលោមភាពផ្នែកបរិមាណ ។
ចំពោះតម្លៃលក់រាយរបស់ស្ថានីយ/ដេប៉ូ ទាំង០៩ទីតាំងខាងលើ បានអនុវត្តត្រឹមត្រូវតាមសេចក្តីជូនដំណឹងរបស់ក្រសួងពាណិជ្ជកម្ម។
មន្រ្តីកាំកុងត្រូលបានណែនាំនិងឱ្យម្ចាស់ស្ថានីយ/ដេប៉ូ ដែលត្រូវបានរកឃើញមានភាពមិនអនុលោមខាងលើ ធ្វើកិច្ចសន្យាកែតម្រូវឡើងវិញ ពុំនោះទេនៅពេលដែលមន្រ្តីជំនាញរកឃើញកំហុសលើកទី២ ស្ថានីយទាំងនោះ នឹងប្រឈមចំពោះការផ្សព្វផ្សាយជាសាធារណ:តាមប្រព័ន្ធសារព័ត៌មាននានា ឬអាចនឹងប្រឈមចំពោះមុខច្បាប់៕
មតិយោបល់