ភ្នំពេញៈ ប្រជាពលរដ្ឋភ្ញាក់ផ្អើលទាំងព្រឹក ខណៈប្រទះឃើញម៉ូតូសេ១២៥ មួយគ្រឿង ក្នុងទឹកស្រះមួយកន្លែង ដែលសង្ស័យជាប់ពាក់ព័ន្ធទៅនឹងបទល្មើសលួចបានហើយ តែយកទៅមិនរួច ទើបរុញទម្លាក់ទឹក កាលពីវេលាម៉ោង៧ព្រឹក ថ្ងៃទី០៤ ខែកក្កដា ឆ្នាំ២០១៦ ស្ថិតនៅក្នុងភូមិត្រពាំងជ្រៃ សង្កាត់កាកាប ខណ្ឌពោធិ៍សែនជ័យ។
ប្រភពឲ្យដឹងថា ហេតុការណ៍ខាងលើនេះ កើតឡើងបន្ទាប់ពីប្រជាពលរដ្ឋប្រទះឃើញម៉ូតូសេ១២៥ មួយគ្រឿង ពាក់ស្លាកលេខ កណ្តាល 1C-1219 ស្ថិតក្នុងស្ថានភាព អស់គ្រឿងមួយចំនួន មិនដឹងមូលហេតុ មិនស្គាល់ម្ចាស់ ប្រទះឃើញនៅក្នុងស្រះទឹក ក៏រាយការណ៍ទៅសមត្ថកិច្ចចុះអន្តរាគមន៍ភ្លាមៗ ដើម្បីបើកការស៊ើបអង្កេតស្រាវជ្រាវរកម្ចាស់ និងមូលហេតុពិត។
ប្រភពបន្តថា តាមប្រជាពលរដ្ឋនៅកន្លែងកើតហេតុ បានឲ្យដឹងថា ម៉ូតូខាងលើ បន្ទាប់ពីពួកគាត់ធ្វើដំណើរឆ្លងកាត់តាមមាត់ស្រះទឹក ស្រាប់តែប្រទះឃើញដូចនេះ ក៏រាយការណ៍ប្រាប់សមត្ថកិច្ចតែម្តង។ នៅកន្លែងកើតហេតុ ពលរដ្ឋខ្លះដាក់ការសង្ស័យថា ប្រហែលជាមានជនល្មើស លួចពីទីណាមកហើយ ជិះទៅមុខលែងរួច ទើបរុញទម្លាក់ទឹក ខ្លះលើកឡើងថា ប្រហែលជាម្ចាស់ស្រវឹងជ្រុល ទើបជិះធ្លាក់ទឹក ព្រោះនៅកន្លែងកើតហេតុមានសល់សាច់ក្លែម និងដបស្រានៅជិតមាត់នោះដែរ។
តែទោះជាមានការលើកឡើងផ្សេងៗគ្នាយ៉ាងណាក៏ដោយ មូលហេតុយ៉ាងណានោះ ពុំទាន់ដឹងច្បាស់នៅឡើយ ហើយសមត្ថកិច្ច ស្រង់លើកម៉ូតូ យកទៅរក្សាទុកនៅប៉ុស្តិ៍កាកាប រងចាំស្រាវជ្រាវរកម្ចាស់ ទើបដឹងមូលហេតុពិតប្រាកដ៕
មតិយោបល់