ភ្នំពេញ: គួរឲ្យអាសូរណាស់ បុរសបរទេសម្នាក់បានបោកក្បាលស្លាប់ ជាមួយឆ្កែរបស់គាត់ ខណ:ពេលកំពុងជិះម៉ូតូ Scoopy ដឹកឆ្កែ បែរជាត្រូវនារី២នាក់ជិះម៉ូតូ Zoomer-X ឌុបគ្នា វ៉ាជែងរថយន្តក្នុងល្បឿនលឿន ក៏ជ្រុលទៅបុកពេញទំហឹងដួលទាំងសងខាង។ ចំណែកនារីទាំង២នាក់ នោះក៏រងរបួសធ្ងន់ដែរ ត្រូវបានរថយន្តគិលានសង្គ្រោះគ្លីនិកឯកជន ដឹកយកទៅសង្គ្រោះភ្លាមៗ បង្កការភ្ញាក់ផ្អើលឡើងទាំងព្រលឹម។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតមានឡើងនៅវេលាម៉ោង៥ទៀបភ្លឺ ឈានចូលថ្ងៃទី២៧ ខែវិច្ឆិកា ឆ្នាំ២០១៨នេះ នៅតាមបណ្តោយផ្លូវ៣៧១ ម្ដុំស្ថានីយ៍បូមទឹកបឹងទំពុន ជិតក្លឹបឌីក្លូ ឌឹ មីង ស្ថិតក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។
សពបុរសបរទេសខាងលើ មិនទាន់ស្គាល់អត្តសញ្ញាណនៅឡើយទេ។ ចំណែកឯនារី២នាក់ដែលរបួសធ្ងន់នោះ ក៏នៅមិនទាន់ស្គាល់អត្តសញ្ញាណដូចគ្នាដែរ ។
តាមប្រភពព័ត៌មានពីកន្លែងកើតហេតុបានដឹងថា នៅមុនពេលកើតហេតុ គេបានឃើញបុរសបរទេសរងគ្រោះខាងលើ ជិះម៉ូតូមួយគ្រឿង ម៉ាក Scoopy ពណ៌ឈាមជ្រូក ពាក់ស្លាកលេខ ភ្នំពេញ 1CG-3912 ធ្វើដំណើរក្នុងទិសដៅពីកើតទៅលិច ក្នុងល្បឿនធម្មតា ដោយមានដឹកឆ្កែមួយក្បាលនៅលើម៉ូតូផងដែរ លុះដល់ចំណុចកើតហេតុស្រាប់តែ មាននារីរូបស្រស់២នាក់ ជិះមួយគ្រឿង ម៉ាក Zoomer-X ពណ៌ក្រហមលាយស បានធ្វើដំណើរទិសដៅពីលិចទៅកើត ក្នុងល្បឿនលឿន បានវ៉ាជែងរថយន្តមួយគ្រឿងទៀត(មិនចាំម៉ាក) ក៏បុកទៅចំពេញទំហឹងតែម្ដង បណ្ដាលឲ្យដួលទាំងសងខាង ដោយបុរសបរទេសខាងលើ បានបោកក្បាលនឹងថ្នល់ស្លាប់ភ្លាមៗគួរឲ្យអាសូរ ខណ:ដែលឆ្កែនៅលើម៉ូតូនោះ ក៏ខ្ទាតមកកណ្ដាលផ្លូវស្លាប់ជាមួយម្ចាស់ផងដែរ។ ចំណែកឯនារីរូបស្រស់ទាំង២នាក់នោះ បានរងរបួសធ្ងន់ នៅហ្នឹងកន្លែងកើតហេតុដែរ ទើបបង្កការភ្ញាក់ផ្អើលដល់បងប្អូនប្រជាពលរដ្ឋនិងអ្នកដំណើរ រួចរាយការណ៍ប្រាប់ឲ្យសមត្ថកិច្ចមូលដ្ឋានចុះមកកន្លែងកើតហេតុ និងហៅរថយន្តសង្គ្រោះបន្ទាន់មកដឹកជនរងគ្រោះយកទៅមន្ទីរពេទ្យផងដែរ។
បច្ចុប្បន្នក្រោយពេលកើតហេតុ ជនរងគ្រោះ ត្រូវបានរថយន្តគិលានសង្គ្រោះគ្លីនិកឯកជន មកដឹកយកទៅមន្ទីរពេទ្យ។ ចំណែកសមត្ថកិច្ចមូលដ្ឋានបានចុះមកដល់ ហើយបានធ្វើការសាកសួរ អ្នកដែលឃើញហេតុការណ៍ និងរាយការណ៍ប្រាប់សមត្ថកិច្ចជំនាញ ចុះមកកន្លែងកើតហេតុ ដើម្បីធ្វើការវាស់វែង និងយកម៉ូតូជនរងគ្រោះទៅរក្សាទុកដើម្បីរង់ចាំដោះស្រាយគ្នាពេលក្រោយ ៕
មតិយោបល់