ភ្នំពេញ: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា នៅវេលាម៉ោង៧និង៣០នាទីព្រឹក ថ្ងៃ០៦ ខែធ្នូ ឆ្នាំ២០១៨ នៅចំណុចអគារកំពុងសាងសង់វិទ្យាស្ថាន វិជ្ជាសាស្ដ្រអគ្គិសនីរបស់អគ្គិសនីជាតិកម្ពុជា ផ្លូវ២១៧ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ មានករណីបុរសម្នាក់កើតជំងឺគាំងបេះដូងបណ្តាលឲ្យស្លាប់ ខណ:ដែលកំពុងអង្គុយលើបង់។
ជនរងគ្រោះឈ្មោះ ឃិត ឡាច ភេទប្រុស អាយុ៦០ឆ្នាំ ជនជាតិខ្មែរ មុខរបរជាងថ្មដុស ស្នាក់នៅផ្ទះជួលសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មានស្រុកកំណើត ភូមិរកាដុស ឃុំក្រាំងត្រយ៉ង ស្រុកពាមជរ ខេត្តព្រៃវែង។ ស្លាកស្នាមជនរងគ្រោះ មានស្នាមកោសរលាត់នៅលើសៀតថ្កាខាងស្ដាំ និងស្នាមក្រោយស្លឹកត្រចៀកខាងស្ដាំ ។
ប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះបំពេញការងារធម្មតា ជាជាងថ្មដុស ជាមួយប្រពន្ធ ហើយគាត់អង្គុយលើបង់ស្រាប់តែដួលផ្កាប់មុខបណ្ដាលឲ្យស្លាប់តែម្ដង។
តាមការអះអាងរបស់ប្រពន្ធជនរងគ្រោះ ឈ្មោះ អ៊ឹង អាត អាយុ៥០ឆ្នាំ មុខរបរកម្មករសំណង់ បានឲ្យដឹងថា កន្លងមកជនរងគ្រោះមានជំងឺឈាមស ស៊ីឈាមក្រហម និងលើសឈាមប្រចាំកាយ ហើយកាលពីយប់ត្អូញប្រាប់ប្រពន្ធថាចុកស្មា និងដៃ ។
សន្និដ្ឋានវាយតម្លៃរបស់ការិយាល័យបច្ចេកទេស និងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ គឺជនរងគ្រោះស្លាប់ដោយសារគាំងបេះដូង។
បច្ចុប្បន្ន ក្រុមគ្រួសារបានទទួលសពយកធ្វើបុណ្យតាមប្រពៃណីនៅស្រុកកំណើត៕
មតិយោបល់