កំពតៈ យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា នៅព្រឹកថ្ងៃទី៩ ខែធ្នូ ឆ្នាំ២០១៨ សមត្ថកិច្ចបានទទួលព័ត៌មានថា មានករណីជនបរទេសស្លាប់នៅផ្ទះសំណាក់ MAGIC SPONGE ស្ថិតនៅភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត ។
សមត្ថកិច្ចបានឲ្យដឹងថា ជនរងគ្រោះឈ្មោះ GAPPA HUNTER JAMES ភេទប្រុស ជនជាតិអាមេរិក អាយុ២០ឆ្នាំ មកប្រទេសកម្ពុជាជាភ្ញៀវទេសចរ ។ ជនរងគ្រោះស្លាប់ ដេកផ្កាប់មុខ នៅលើទីធ្លាមុខផ្ទះសំណាក់ ដោយរបួសបែកក្បាល ហូរឈាមជាច្រើននៅជុំវិញនោះ ដោយមានបៀមួយហ៊ូនៅលើដំបូលក្នុងទស៊ីម៉ង់នៃចុងក្បឿងដំបូលលើ និងមានស្នាមជ្រះធូលី ដែលនៅជាប់ក្បឿងនោះ ។
សមត្ថកិច្ចសន្និដ្ឋានថា ជនរងគ្រោះលូកដៃយកបៀដែលធ្លាក់នៅលើទឹកផ្នែកខាងលើនោះ រួចរអិលធ្លាក់មកក្រោម កំពស់ប្រមាណជិត១០ម៉ែត្រ បណ្តាលឲ្យបែកក្បាលស្លាប់នៅម៉ោងប្រមាណ១ទៅ៣រំលងអធ្រាត្រ ឈានចូលថ្ងៃទី៩ ខែធ្នូ ឆ្នាំ២០១៨ ។
បច្ចុប្បន្ន សមត្ថកិច្ចកំពុងពិនិត្យបន្ថែមស្លាកស្នាមផ្សេងទៀត ដូចជាមានសក់នៅជាប់នឹងស៊ីម៉ងត៍ នៅត្រង់កន្លែងរអិលធ្លាក់ និងសួរសាក្សីមួយចំនួនដែលដឹងហេតុការណ៍ និងរាយការណ៍លំអិតបន្ថែមអំពីលទ្ធផលចុងក្រោយ ៕
មតិយោបល់