ភ្នំពេញ: នៅថ្ងៃទី០៩ ខែធ្នូ ឆ្នាំ២០១៨ សមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនជនសង្ស័យ​២នាក់ ជាចោរលួច(ម៉ូតូ) ទៅតុលាការ ដើម្បីធ្វើការផ្តន្ទាទោសតាមច្បាប់។

ករណីលួចនេះ កើតឡើងកាលពីថ្ងៃទី០៧ ខែធ្នូ ឆ្នាំ២០១៨ វេលាម៉ោង១០:១៥នាទី នៅចំណុច ផ្លូវលំ ក្រុមទី២ ភូមិទ្រា២ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ខណ:​ដែលមានជនសង្ស័យ​២នាក់ កំពុងតែគាស់ស្លាកលេខចេញពីម៉ូតូ​១គ្រឿង ម៉ាក ស៊ីរ៉ុស ពណ៌ខ្មៅ ពេលនោះ កម្លាំងមូលដ្ឋានអាវុធហត្ថខណ្ឌមានជ័យ ល្បាតឃើញ មានការសង្ស័យ ក៏ឃាត់ខ្លួនពួកគេទាំង​២នាក់ មកសួរនាំ ឃើញរូបគេទាំង​២នាក់ ជាចោរលួច(ម៉ូតូ) ប្រាកដមែន។

​ពួកគេទាំង​២នាក់នេះមាន៖ ទី១មានឈ្មោះ ជឿន ណារិទ្ធ ហៅខុង ភេទប្រុស អាយុ ១៨ឆ្នាំ និងទី​២​ឈ្មោះ វ៉ា សុខគា ភេទប្រុស អាយុ​២៩ឆ្នាំ។

ក្រោមវិធានការនៃការសាកសួរ របស់សមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ ឈ្មោះ ជឿន ណារិទ្ធ ហៅខុង និងឈ្មោះ វ៉ា សុខគា បានសារភាពឲ្យដឹងថា ពួកគេទាំង​២នាក់ ទើបតែស្គាល់គ្នាបានប្រហែល​១ខែប៉ុណ្ណោះ ហើយថែមទាំងធ្លាប់ជក់គ្រឿងញៀនជាមួយគ្នាផងដែរ។ នៅថ្ងៃកើតហេតុ ឈ្មោះ ជឿន ណារិទ្ធ ហៅខុង បានខ្ចីម៉ូតូរបស់ឈ្មោះ ថា ភេទប្រុស អាយុប្រហែល១៩ឆ្នាំ ម៉ាក ស៊ីរ៉ុស ពណ៌ខ្មៅ ស្លាកលេខ បាត់ដំបង​1B-2896 ដោយកុហកថា ខ្ចីជិះ​ទៅទិញចំណីហូប។
បន្ទាប់មក រូបគេបានជិះម៉ូតូនោះ ទៅភូមិទ្រា២ សង្កាត់ស្ទឹងមានជ័យ១ ខណ្ឌមានជ័យ ហើយបានគាស់ស្លាកលេខម៉ូតូនោះចេញ រហូតដល់វេលាម៉ោង ១០:១៥នាទីថ្ងៃដដែល រូបគេបានឲ្យឈ្មោះ វ៉ា សុខគា ទៅទិញខ្ចៅ យកមកចាប់ស្លាកលេខម៉ូតូនោះវិញ ហើយពេលដែលរូបគេទាំង​២នាក់ កំពុងចាប់ស្លាកលេខម៉ូតូនោះ ក៏មានសមត្ថកិច្ចអាវុធហត្ថចុះមកធ្វើការឃាត់ពួកខ្លួនតែម្តង។

ឈ្មោះ ជឿន ណារិទ្ធ ហៅខុង បានប្រាប់ឲ្យដឹងទៀតថា កន្លងមករូបគេធ្លាប់ជាប់ពន្ធនាគារព្រៃសររយ:ពេល ០១ឆ្នាំ ចេញមកវិញកាលពីថ្ងៃទី២៥ ខែមករា ឆ្នាំ២០១៧ ហើយពេលចេញមកវិញ រូបគេបានបន្តធ្វើសកម្មភាពលួចម៉ូតូ និងឆក់កាបូបជាញឹកញាប់ផងដែរ ក្នុងភូមិសាស្រ្តរាជធានីភ្នំពេញ៕