Post News Media ព័ត៌មានជាតិ វីវ៉ា សាកកម្ល...

វីវ៉ា សាកកម្លាំងជាមួយ សង់សេ១២៥ លើផ្លូវជាតិលេខ៣ របួសធ្ងន់ស្រាល៣នាក់!

ភ្នំពេញ: មនុស្ស៣នាក់រងរបួស ក្នុងនោះមាន២នាក់រងបួសធ្ងន់បាក់ជើង បាក់ដៃ និងម្នាក់ទៀតរងរបួសស្រាល បន្ទាប់ពីជិះម៉ូតូបុកគ្នាយ៉ាងពេញទំហឹង កាលពីវេលាម៉ោង៥និង៣០នាទីល្ងាចថ្ងៃទី១០ ខែធ្នូ ឆ្នាំ២០១៨ ស្ថិតនៅលើកំណាត់ផ្លូវជាតិលេខ៣ ភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិ៍សែនជ័យ ។

ភាគីខាងម៉ូតូម៉ាក វីវ៉ា ពណ៌ខ្មៅ ពាក់ស្លាកលេខ ភ្នំពេញ 1M-3010 ជិះគ្នា២នាក់ ជីតា និងចៅប្រុស បើកបរដោយឈ្មោះ ឌិញ ដាង ភេទប្រុស អាយុ៦៣ឆ្នាំ មុខរបរ កម្មករសំណង់ រងរបួសបាក់ជើងស្តាំ រួមដំណើរជាមួយ ចៅប្រុស ឈ្មោះ តឹក ជា អាយុ១៩ឆ្នាំ មុខរបរ កម្មករសំណង់ ជាមួយជីតាដែរ រងរបួសស្រាល មានទីលំនៅ ភូមិបែកចាន ឃុំបែកចាន ស្រុកអង្គស្នួល ខេត្តកណ្តាល ។ ចំណែកភាគីម៉ូតូ ម៉ាកហុងដា សេ១២៥ សេរី២០១៦ ពណ៌ខ្មៅ ពាក់ស្លាកលេខ ភ្នំពេញ 1FW-9507 ជិះម្នាក់ឯងដោយឈ្មោះ រិន កែវ ភេទប្រុស អាយុ១៨ឆ្នាំ មុខរបរ ជាងភ្លើង ស្នាក់នៅផ្ទះជួល ភូមិអង្គត្រគៀត សង្កាត់កន្ទោក ខណ្ឌពោធិ៍សែនជ័យ មានស្រុកកំណើត ភូមិប្រាំយ៉ាម ឃុំប្រាំយ៉ាម ស្រុកស្រីសន្ធរ ខេត្តកំពង់ចាម រងរបួសបាក់ជើងស្តាំ និងដៃ ។

តាមសម្តីជនរងគ្រោះ ជាភាគីម៉ូតូ វីវ៉ា បាន្យដឹងថា មុនកើតហេតុ គាត់ជិះម៉ូតូចេញពីធ្វើការងារសំណង់ ឆ្ពោះទៅផ្ទះ ធ្វើដំណើរកាត់តាមផ្លូវជាតិលេខ៣ ពីត្បូងទៅជើង ដល់ចំណុចខាងលើ ឆ្លងផ្លូវទៅលិច ក៏ត្រូវម៉ូតូសេ១២៥ ជិះពីជើងទៅត្បូងល្បឿនលឿនជ្រុល មកបុកតែម្តង ។

តាមសម្តីជនរងគ្រោះ ភាគីខាងម៉ូតូសេ១២៥វិញ បានឲ្យដឹងថា មុនកើតហេតុខ្លួនជិះម៉ូតូ ចេញពីកន្លែងធ្វើការងារ ជាងភ្លើង នៅសង្កាត់ក្រាំងធ្នង់ ខណ្ឌសែនសុខ ឆ្ពោះទៅផ្លូវ កាត់តាមផ្លូវជាតិលេខ៣ ពីជើងទៅត្បូង ដល់ចំណុចខាងលើ ស្រាប់តែម៉ូតូវីវ៉ា បើកច្រាសទិស ហើយឆ្លងផ្លូវវឹងមក ទើបហ្វ្រាំងមិនទាន់ជ្រុលបុកពេញទំហឹងតែម្តង ។

ក្រោយកើតហេតុ ជនរងគ្រោះទាំង៣នាក់ ត្រូវបានរថយន្តសង្រ្គោះរបស់អង្គភាព៧១១ ដឹកបញ្ជូនទៅមន្ទីរពេទ្យ ព្រះកុសុម: ចំណែកឯម៉ូតូទាំង២គ្រឿង សមត្ថកិច្ចវាស់វែងរួចយកទៅរក្សាទុកនៅផ្នែកជំនាញអធិការដ្ឋានខណ្ឌ រង់ចាំដោះស្រាយពេលក្រោយ ៕