ភ្នំពេញ: បុរស២នាក់ជិះម៉ូតូចេញពីផឹកស៊ី ក្នុងល្បឿនយ៉ាងល្បឿនដូចហោះមិនប្រយ័ត្ន ក៏ជ្រុលទៅបុកនិងម៉ូតូរ៉ឺម៉កកង់បីមួយគ្រឿងទៀតដែលបើកបញ្រ្ចាសទិសគ្នាចំពីមុខពេញទំហឹង កាលពីវេលាម៉ោង១១និង៥០នាទីយប់ ថ្ងៃទី១០ ខែធ្នូ ឆ្នាំ២០១៨ ត្រង់ចំណុចខាងមុខតារាងបាល់ទាត់រយស័រវែន តាមបណ្តោយផ្លូវ៥៩៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតគេឃើញបុរសម្នាក់បើកម៉ូតូរ៉ឺម៉កកង់បីមួយគ្រឿង ពាក់ស្លាកលេខ ភ្នំពេញ 1I-6003 ដោយធ្វើដំណើរតាមបណ្ដោយផ្លូវ៥៩៨ ក្នុងទិសដៅមកពីស្តុបរង្វង់កាំខូស៊ីតធី ឆ្ពោះទៅស្ពានអាកាស៧មករា។ លុះមកដល់ចំណុចកើតហេតុខាងលើដែលជាផ្លូវកោង ក៏ស្រាប់តែមានម៉ូតូមួយគ្រឿងទៀតម៉ាក ហុងដាឌ្រីម ស៊េរី០១៨ ពណ៌ខ្មៅ ពាក់ស្លាកលេខ ភ្នំពេញ1FQ-9493 ដែលបើកបរដោយបុរស២នាក់ទើបតែចេញពីរផឹកស៊ីនៅផ្ទះបងប្អូននៅម្តុំផ្សារដីហ៊ុយ ហើយបំណង់ជិះទៅកន្លែងធ្វើវិញដែរនៅក្បែរកន្លែងកើតហេតុ។ ដោយធ្វើដំណើរតាមបណ្តោយផ្លូវ៥៩៨ ក្នុងទិសដៅបញ្រ្ចាសទិសគ្នា និងក្នុងល្បឿនយ៉ាងលឿន ដោយខ្វះការប្រុងប្រយ័ត្នក៏ជ្រុលទៅបុកម៉ូតូរម៉កកង់បីខាងចំពីមុខពេញទំហឹងបណ្ដាលឲ្យម៉ូតូនិងម៉ូតូកង់បីរងការខូចខាតយ៉ាងដំណំ ចំណែកឯបើកម៉ូតូរម៉កកង់បីបានបែកក្បាលស្លាប់ភ្លាមៗយ៉ាងអាណោចអាធ័ម។ ដោយឡែកអ្នកបើកបរម៉ូតូបង្ករងរបួសធ្ងន់ម្នាក់និងស្រាលម្នាក់ ហើយក៏ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅគ្លីនិកសម្ភព ពន្លឺ ភ្លាមៗផងដែរ។
សមត្ថកិច្ចបានឲ្យដឹងថាសពបុរសរងគ្រោះដែលស្លាប់បាត់បង់ជីវិតខាងលើមានឈ្មោះ ឡុង សារឿន អាយុ៣៨ឆ្នាំ ស្នាក់នៅក្រុងតាខ្មៅ ខេត្តកណ្ដាល មានស្រុកកំណើតនៅឃុំរោងដំរី ស្រុកបាភ្នំ ខេត្តព្រៃវែង។
ក្រោយពេលកើតហេតុសមត្ថកិច្ចមូលដ្ឋានក៏បានចុះទៅដល់កន្លែងកើតហេតុ ហើយក៏បានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយកម៉ូតូនិងម៉ូតូកង់បីខាងលើទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីដើម្បីរង់ចាំម្ចាស់រថយន្តចូលខ្លួនមកធ្វើការដោះស្រាយនៅពេលក្រោយ។ ដោយឡែកសពបុរសរងគ្រោះត្រូវបានសមត្ថកិច្ចប្រគល់ទៅឲ្យសាច់ញាតិក្រុមគ្រួសារដឹកយកទៅធ្វើបុណ្យទៅតាមប្រពៃណីនៅឯស្រុកបាភ្នំដែលជាស្រុកកំណើត៕
មតិយោបល់