ភ្នំពេញៈ នារីរូបស្រស់ម្នាក់បើករថយន្តមួយគ្រឿងទាំងសភាពស្រវឹងស្រា មិនប្រយ័ត្នក៏ជ្រុលទៅបុកក្បាលព្រួញពុះចែកទ្រូងផ្លូវ បណ្តាលឲ្យវៀចអស់មួយកង់ កាលពីវេលាម៉ោង១២និង៥០នាទីរំលងអធ្រាត្រ ឈានចូលថ្ងៃទី១៤ ខែធ្នូ ឆ្នាំ២០១៨ ត្រង់ចំណុចក្បែរវិទ្យាល័យសន្ធរម៉ុក តាមបណ្ដោយផ្លូវកម្ពុជាក្រោម កែងនិងផ្លូវលេខ២៥៣ ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញនារីរូបស្រស់សោភាម្នាក់បើកបររថយន្តមួយគ្រឿងម៉ាក តូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2AC-2376 បើកបរក្នុងស្ថានភាពស្រវឹង តាមបណ្ដោយផ្លូវកម្ពុជាក្រោម ក្នុងទិសដៅពីកើតទៅលិច និងក្នុងល្បឿនយ៉ាងលឿន។ លុះមកដល់ចំណុចកើតហេតុ ស្រាប់តែរថយន្តខាងលើក៏ជ្រុលចង្កូតទៅបុកនិងក្បាលព្រួញពុះចែកទ្រូងផ្លូវពេញទំហឹងបណ្ដាលឲ្យវៀចអស់មួយកង់។ ចំណែកឯរថយន្តបង្ករងការខូចខាតកំពិតផ្នែកខាងមុខយ៉ាងដំណំទៅមុខលែងរួច។ ប៉ុន្តែសំណាងល្អដែរមិនបានបង្កឲ្យមាននរណាម្នាក់រងរបួស។ លុះមួយសន្ទុះក្រោយមកក៏ស្រាប់តែមានរថយន្តមួយគ្រឿងទៀតម៉ាក ម៉ាក់ស័រដេះ ពណ៌ស គ្មានស្លាកលេខ បានបើកមកយកនារីរូបដែលជាអ្នកបើកបររថយន្តបង្កគេចចេញពីកន្លែងកើតហេតុបាត់ស្រមោលបន្សល់ទុកតែរថយន្តបង្កដែលរងការខូចខាតនៅនិងកន្លែងកើតហេតុប៉ុណ្ណោះ។
ក្រោយពេលកើតហេតុសមត្ថកិច្ចមូលដ្ឋានក៏បានចុះទៅដល់កន្លែងកើតហេតុហើយក៏បានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងនិងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់នៅពេលក្រោយ៕
មតិយោបល់