ភ្នំពេញ: ករណីគ្រោះថ្នាក់ចរាចរណ៍ រថយន្តមួយគ្រឿងបុករះរទេសសំរាម និងបង្គោលថ្មបាក់អស់៤ដើម ហើយបន្តបុកការ៉ាស់សាំងតេលា បណ្ដាលឲ្យបាក់ទូចាក់សាំងអស់មួយ កាលពីវេលាម៉ោង១២និង១៥នាទីរំលងអធ្រាត្រ ឈានចូលនៅថ្ងៃទី១៦ ខែធ្នូ ឆ្នាំ២០១៨ តាមបណ្ដោយផ្លូវព្រះនរោត្ដម ក្បែរស្ពានអាកាសក្បាលថ្នល់ ជាប់អគ្គស្នងការដ្ឋាននគរបាលជាតិ ស្ថិតក្នុងសង្កាត់ទន្លេបាសាក់ ខណ្ឌចម្ការមន។
សមត្ថកិច្ច បានឲ្យដឹងថារថយន្ដស៊េរីទំនើបមួយគ្រឿង ម៉ាក HYUNDAI ពណ៌ខ្មៅ ពាក់ស្លាកលេខ ពណ៌ទឹកក្រូច AT18 2-0460 បើកដោយបុរសមា្នក់ ក្នុងស្ថានភាពស្រវឹងស្រាជោកជាំ ធ្វើដំណើរទិសដៅពីជើងទៅត្បូង ក្នុងល្បឿនលឿន ខណ:មកដល់ចំណុចកើតហេតុ បានរេចង្កូតបុករះរទេះសំរាមរាយសំរាមពេញផ្លូវ និងបង្គោលថ្មបាក់អស់ចំនួន៤ដើម នៅមុខក្រសួងវប្បធម៌ រួចជ្រុលទៅបុកការ៉ាស់សាំងតេលា រងការខូចខាតបាក់ទូចាក់សាំងមួយគ្រឿង ។
ភ្លាមៗផងដែរ ម្ចាស់ការ៉ាស់សាំង បានយកបំពង់ពន្លត់អគ្គិភ័យចំនួន៤បំពង់ មកបាញ់ការពារ ខ្លាចមានការឆាបឆេះ។
ក្រោយកើតហេតុ សមត្ថកិច្ចបានចុះមកកន្លែង ធ្វើការវាស់វែងនិងយករថយន្តបង្ក ទៅរក្សាទុកនៅប៉ុស្តិ៍ ដើម្បីរង់ចាំម្ចាស់រថយន្ដដោះស្រាយទៅតាមផ្លូវច្បាប់៕
មតិយោបល់