មហាសេដ្ឋីទូរគមនាគមន៍ម៉ិកស៊ិក លោក Carlos Slim Helú បានក្លាយជាមហាសេដ្ឋីដែលមានទ្រព្យច្រើនជាងគេបំផុតលំដាប់ទី១ នៅក្នុងពិភពលោក ម្ដងទៀត ដោយបានទម្លាក់លោក Bill Gates សហស្ថាបនិក Microsoft។
នៅថ្ងៃអង្គារម្សិលមិញនេះ ភាគហ៊ុនរបស់ក្រុមហ៊ុនទូរគមនាគមន៍ América Móvil បានកើនឡើងទាំងនៅក្នុងប្រទេសម៉ិកស៊ិក និងសហរដ្ឋអាមេរិក ប្រមាណជា ១ភាគរយ ឬស្មើនឹង ៨០៥,៦លានដុល្លារអាមេរិក ដែលធ្វើឲ្យទ្រពសម្បត្តិរបស់លោក Carlos Slim Helú កើនឡើងដល់ ៧៩,៦ពាន់លានដុល្លារអាមេរិក ខណៈដែលពេលនេះ លោក Bill Gates មានត្រឹមតែ ៧៩,១ពាន់លានដុល្លារអាមេរិក។
ភាគហ៊ុនរបស់ក្រុមហ៊ុន América Móvil បានចាប់ផ្ដើមកើនឡើងក្រោយពេលដែលក្រុមហ៊ុននេះ ប្រកាសដកខ្លួនចេញពីទ្រព្យសកម្មមួយចំនួន និងបានអនុវត្តន៍ទៅតាមច្បាប់កំណត់ថ្មីរបស់ប្រទេសម៉ិកស៊ិក។
ចន្លោះពីថ្ងៃទី០១ខែកក្កដា ដល់ថ្ងៃទី១១ខែកក្កដា ទ្រព្យសម្បតិ្តរបស់លោក Carlos Slim Helú បានកើនឡើងពី ៧៤,៥ពាន់លានដុល្លារអាមេរិក ដល់ ៧៩,៦ពាន់លានដុល្លារអាមេរិក មានន័យថា កើនឡើង ៥,១ពាន់លានដុល្លារអាមេរិក ក្នុងរយៈពេល ១២ថ្ងៃ។
លោក Carlos Slim Helú បានធ្លាក់ពីតំណែងមហាសេដ្ឋីទី១លំដាប់ពិភពលោក កាលពីឆ្នាំ ២០១៣ បន្ទាប់ពីទ្រព្យសម្បត្តិរបស់លោក Bill Gates កើនឡើង៕
មតិយោបល់