Post News Media ព័ត៌មានជាតិ ជិះម៉ូតូលឿនពេ...

ជិះម៉ូតូលឿនពេក​ ជ្រុល​ទៅ​បុក​រថយន្ត​ស៊េរី​ទំនើបRANGE ROVER ស្លាកលេខ​ ភ្នំពេញ​ 2AJ-2797​ ​រងការខូចខាត​យ៉ាង​ដំណំ​

ភ្នំពេញ: បុរស​ម្នាក់​បើកបរ​ម៉ូតូ​មួយ​គ្រឿង ​បោះ​ពួយ​យ៉ាង​លឿន​ដោយ​ខ្វះ​ការ​ប្រុងប្រយ័ត្ន​ក៏​ជ្រុល​ទៅ​បុក​រថយន្ត​ស៊េរី​ទំនើប​មួយ​គ្រឿង​ទៀត ​ដែល​បើក​បត់​ឆ្លងផ្លូវ​ពេញ​ទំហឹង ​បណ្តាល​ឲ្យ​អ្នកបើកបរម៉ូតូរងរបួស​ធ្ងន់ធ្ងរ​ កាលពីវេលា​ម៉ោង​១០និង២០នាទី​យប់​ ថ្ងៃទី​១៩​ ខែធ្នូ​ ឆ្នាំ​២០១៨ ត្រង់ចំណុច​ជាប់របង​ខាងមន្ទីរ​ពេទ្យ​កុមារ​ជាតិ​ តាម​បណ្ដោយ​ផ្លូវ​សហព័ន្ធ​រុស្ស៊ី ស្ថិត​ក្នុង​សង្កាត់​ទឹកល្អក់​ទី​១​ ខណ្ឌ​ទួលគោក​។

តាមប្រភពព័ត៌មាន​ពីកន្លែងកើតហេតុបាន​ឲ្យ​ដឹង​ថា​ នៅ​មុន​ពេល​កើត​ហេតុ​គេ​ឃើញ​បុរស​នារី​មួយ​គូបើកបរ​រថយន្ត​ស៊េរី​ទំនើប​មួយ​គ្រឿង​ម៉ាក​ RANGE ROVER ពណ៌ស​ ពាក់ស្លាកលេខ​ ភ្នំពេញ​ 2AJ-2797​ ដោយធ្វើដំណើរតាម​បណ្តោយផ្លូវ​សហព័ន្ធ​រុស្សី​ ក្នុងទិសដៅពីកើតទៅលិច​។ លុះមកដល់​ចំណុច​កើត​ហេតុ​រថយន្តខាងលើ​ក៏​បាន​បត់ឆ្វេង​ឆ្លង​ផ្លូវ​បម្រុងទៅផ្លូវ២៥៣​។ ខណ:ដែល​បត់ឆ្លង​បាន​ពាក់​កណ្តាល​ផ្លូវ​ ក៏ស្រាប់​តែ​មាន​ម៉ូតូ​មួយ​គ្រឿង​ម៉ាក​ ស៊ុយសាគីនិច​ ពណ៌​ស​ ពាក់ស្លាកលេខ​ 1FW-3869​ បើកបរ​ដោយបុរស​ម្នាក់​ តាម​បណ្ដោយ​ផ្លូវ​សហព័ន្ធ​រុស្ស៊ី ក្នុងទិសដៅ​បញ្ច្រាស​ទិស​គ្នា​ និងក្នុង​ល្បឿន​យ៉ាង​លឿន​។ ដោយខ្វះការប្រុង​ប្រយ័ត្ន​ក៏ជ្រុល​ទៅ​បុក​រថយន្ត​ខាង​លើចំទ្វារ​ខាងក្រោយ​ចំហៀង​ខាង​ស្តាំ​ពេញ​ទំហឹង​បណ្តាល​ឲ្យ​ក្រពឹត​ ចំណែកឯ​ម៉ូតូ​រងការខូចខាត​ផ្នែកខាងមុខ​យ៉ាង​ដំណំ​។ ដោយឡែក​អ្នក​បើកបរ​ម៉ូតូ​រងរបួស​បាក់ជើងខាងស្តាំ​ និងបែកក្បាល​សន្លប់​ស្ដូកស្ដឹង​ ហើយក៏ត្រូវបានរថយន្ត​សង្គ្រោះ​បន្ទាន់​របស់​គ្លីនិក​ឯក​ហុងហាក់​ដឹក​យកទៅ​សង្គ្រោះ​ ភ្លាមៗ​នោះ​ដោយអ្នក​បើកបរ​រថយន្ត​ព្រួយបារម្ភ​ពី​ បុរស​រងគ្រោះ​ដែល​ជាអ្នកបើកបរ​ម៉ូតូ​ ក៏បានឡើងបើករថយន្តចេញពីកន្លែងកើតហេតុដេញ​តាម​ពីក្រោយរថយន្តសង្គ្រោះបន្ទាន់​រហូតដល់​គ្លីនិក​ដើម្បី​ទៅ​មើល​បុរស​រងគ្រោះ​។

ក្រោយ​ពេល​កើត​ហេតុ​សមត្ថកិច្ច​មូល​ដ្ឋាន​ក៏​បាន​ចុះ​ទៅ​ដល់​កន្លែង​កើត​ហេតុ​ ហើយក៏បានទាក់ទង​ទៅ​សមត្ថកិច្ច​ជំនាញ​ឲ្យចុះមកធ្វើការវាស់វែងយករថយន្តនិងម៉ូតូ​ទៅ​រក្សា​ទុក​នៅ​អធិការ​ដ្ឋាន​នគរបាល​ខណ្ឌ​ទួលគោក​រង់ចាំ​ធ្វើ​ការ​ដោះស្រាយ​គ្នា​ទៅ​តាម​ផ្លូវ​ច្បាប់​នៅ​ពេល​ក្រោយ​៕​