Post News Media ព័ត៌មានជាតិ ក្រុមជើងខ្លាំ...

ក្រុមជើងខ្លាំង! គេឌុបក្មួយគេសោះ ជិះម៉ូតូដេញវាយនិងកាប់ បណ្តាលឲ្យរងរបួសធ្ងន់ ជាប់ខ្នោះទាំង៤!

ភ្នំពេញ: ​ កាលពីវេលាម៉ោង​២និង៣០នាទីយប់ រំលងអធ្រាត្រ ថ្ងៃទី១៩ ខែធ្នូ ឆ្នាំ២០១៨ កម្លាំងអធិការដ្ឋាននគរបាលខណ្ឌឫស្សីកែវ សហការជាមួយប៉ុស្តិ៍នគរបាលរដ្ឋបាលគីឡូម៉ែត្រលេខ៦ បានឃាត់ខ្លួនជនបង្កចំនួន៤នាក់ ដែលបានកាប់ និងគុបលើជនរងគ្រោះ បណ្តាលឲ្យរងរបួសធ្ងន់ ត្រង់ចំណុចលើផ្លូវជាតិលេខ៥ ក្រុមទី២ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។

ជនបង្កទាំង​៤នាក់ ទី១​ឈ្មោះ នាង ឧត្ត​ម ភេទប្រុស អាយុ១៨ឆ្នាំ មុខរបរសិស្ស ស្នាក់នៅផ្ទះគ្មានលេខ ផ្លូវ២០០Ri ក្រុមទី១៣ ភូមិក្រោលគោ សង្កាត់គីឡូម៉ែត្រលេខ៦(គ្មានសារធាតុញៀន)។ ទី២​ឈ្មោះ ម៉ុន សេងហុក ភេទប្រុស អាយុ១៩ឆ្នាំ មុខរបរជាងរថយន្ត ស្នាក់នៅផ្លូវលេខ១៩៧ ខណ្ឌចម្ការមន រាជធានីភ្នំពេញ (គ្មានសារធាតុញៀន)។ ទី៣​ឈ្មោះ ស៊ុន សិលា ភេទប្រុស អាយុ២១ឆ្នាំ មុខរបរកម្មករ ស្នាក់នៅផ្ទះគ្មានលេខ ផ្លូវលេខ៥ ក្រុម៤ ភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ(អ្នកកាប់ជនរងគ្រោះ គ្មានសារធាតុញៀន)។ និងទី៤​ឈ្មោះ សួន ណាស្រី ភេទប្រុស អាយុ២៤ឆ្នាំ មុខរបរគ្មាន ស្នាក់នៅផ្ទះជួល ផ្លូវលំ ក្រុមទី៤ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ(អ្នកកាប់ជនរងគ្រោះ គ្មានសារធាតុញៀ)។ ចំណែកជនរងគ្រោះឈ្មោះ ង៉ែត វុទ្ធី ភេទប្រុស អាយុ៣៤ឆ្នាំ មុខរបរកម្មករ ស្នាក់នៅផ្ទះលេខ០៦៧៨ ផ្លូវបេតុង ភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ(រងរបួសធ្ងន់)។

សម្ភារ: និងវត្ថុតាងដកហូត រួមមាន៖ កាំបិតបុ័ងតោចំនួន២ដើម,​ដុំថ្មចំនួន​២ដុំ និងម៉ូតូមួយគ្រឿងម៉ាក និច ពណ៌លឿង ស្លាកលេខ ភ្នំពេញ 1CE-8857។

​នៅមុនពេលកើតហេតុ ជនរងគ្រោះបានជិះម៉ូតូដឹកក្មួយ ដោយធ្វើដំណើរឆ្លងកាត់កន្លែងកើតហេតុពីត្បូងទៅជើង បន្ទាប់មកក្រុមជនបង្ក បានឃើញស្មានតែចាប់បក្ខពួករបស់គេ ក៏បានជិះម៉ូតូដេញស្ទាក់វាយ និងកាប់ជនរងគ្រោះ បណ្តាលឲ្យរងរបួសធ្ងន់ ត្រង់ភ្លៅខាងឆ្វេង កំភួនជើងខាងស្តាំ កំភួនដៃខាងឆ្វេង និងដាច់ត្រង់គូតមួយកាំបិត។

បច្ចុប្បន្ន ជនរងគ្រោះបានសម្រាកព្យាបាលនៅមន្ទីរពេទ្យសម្តេចឪ គីឡូម៉ែត្រលេខ៦ ចំណែកឯជនបង្កទាំង ៤នាក់ រួមទាំងសម្ភារ:វត្ថុតាង បានឃាត់ខ្លួននៅអធិការដ្ឋាននគរបាលខណ្ឌឫស្សីកែវ ដើម្បីសាកសួរ និងកសាងសំណុំរឿងតាមនីតិវិធី៕